Rokstu sagataveja: portals lakuga.lv

Latvejis postfolklorys festivals “Gaviles” ir veiduots ar mierki īdzeivynuot latvīšu tautysdzīsmis myusu dīnu laikmatā. “Gaviļu” golvonajā koncertā Spīkeru koncertzalē 12. aprelī 19.00 stuņdēs prīcēs pavasareigs muzykys kokteiļs, apvīnojūt kai labi pazeistamus, tai mozuok zynomus muzykus i apvīneibys, storp jim ari latgalīšus. Ituo gods eipašuo tema – dorba duna, informej festivala organizatore Inese Neimane.

Festivalam paradzāti četri īgaviliešonys pasuokumi (bez moksys), bet golvonū koncertu ītreisynuos ar skaņom 15 godus vacais kūklātuojs Namejs Kalniņš i īgavilēs darbeiguo kulturys ministre Dace Melbārde “Stipro Sievu” i “Ogu” pavadeibā. “Ogu” sastuovu veidoj pīcys Jāzepa Vītola Latvejis Muzykys akademejis Etnomuzikologejis i Pedagogejis nūdaļu studentis – kūrzemneica Igeta Gaiķe i četrys Latgolys meitinis Diāna Logina, Ilze Jurjāne, Evelīna Griņova i Agnese Lukjanova. Vokoru vadeis harizmatiskais Ēriks Zeps.

Nu pīsadaleituoju festivala organizatori eipaši izceļ etnominimalistiskuos muzykys duetu “Stanislav Yudin & Asnate Rancāne”, kurā apsavīnojuši džeza kontrabasists Stanislavs Judins i tautys muzykys apvīneibys “Tautumeitas” vadeituoja Asnate Rancāne. Duetam soveigs spieceigs i emocionali pīsuotynuots skaniejums. Ar tradicionaluoku skaniejumu izaceļs jaunradeitais duets “TKP”, kurā sasaspieliejuši pīredzis boguoti improvizacejis meistari Ē. Zeps i Julgī Stalte.

Koncertā izastuos ari “Jauno Jāņu Orķestris”, festivala saiminīki RTU postfolklorys grupa “Daba San”, grupa “Jāņoga”, gosti nu Sicilejis – “Oi Dipnoi”. Vairuok par festivala programu i koncertim varams īsapazeit portala “Facebook” lopā “Gaviles”.

Beleti daīmami “Biļešu Paradīze” kasēs, kai ari škārsteikla vītnē www.bilesuparadize.lv