Rokstu sagataveja: portals lakuga.lv

Daugovpiļs teatrī 12. decembrī byus pyrmizruode īstudiejumam “Raganiņa”, kurā sūpluok latvīšu literarajai volūdai skanēs ari latgalīšu volūda. Tei byus Daugovpiļs teatra pyrmuo bārnu izruode latgaliski, informej teatra puorstuove Janīna Ivanova.

“Daudzim latgalīšu runa var izaklauseit kai nasaprūtami buramvuordi, bet itei izruode byus saprūtama sevkuram skateituojam, jo apzynuotai ir veiduota tai, lai īpazeistynuotu ar volūdys skaniejumu i jautrā nūskaņā, ar ospruoteibu i dzīšmu starpnīceibu, fraāzis latgaliski īsaspīstu atmiņā,” stuosta J. Ivanova.

Īstudiejuma lugys autori Māris Korsiets i Egils Viļumovs stuosta, ka vysa ceļuojuma laikā raganeņa vuiceisīs latgalīšu volūdu. Autori cer, ka tī bārni, kuri kasdīnā narunoj latgaliski, izruodis laikā vuiceisīs kūpā ar golvonū varūni: “Ka bārns piec izruodis nūsavieršonys zynuos koč vīnu vuordu latgaliski, mes byusi laimeigi.”

Ceļā iz sātu raganeņa i juos draudzine vuorna Vallija sasateik ar dažaidim meža īmeitnīkim, kuri runoj jai napazeistamā mēlē, bet tys nimoz natraucej jim atrast kūpeigu volūdu. Grybādama byut loba raganeņa, jei ar prīcu izpaleidz kotram nalaimē tykušajam – voi tī byutu sasakaškiejuši runcyns i kačine, ci olā īslūdzeiti bārni. Tok raganeņa nimoz nanūjauš, kas vysleluokais puorbaudejums vēļ prīkšā.

Raganenis lūmā īsajuss aktrise Zanda Mankopa, puorejuos lūmuos: Inese Ivulāne-Mežale, Līga Ivanova, Maija Korkliša, Anna Blakunova, Anna Jackeviča, Svetlana Morozova, Kristīne Veinšteina, Raimonds Paegle, Jevgeņijs Mihailovs, Vanda Gibovska, Kristīna Zaharova, Ritvars Gailums, Māris Korsiets, Egils Viļumovs.

Īstudiejuma režisors ir Māris Korsiets, izruodis scenografs i kostimu muokslinīks ir Egils Viļumovs, horeografe – Anna Blakunova, muzykaluo nūformiejuma autors – Staņislavs Šimanskis, dzīšmu tekstu autore – Kristīne Veinšteina, gaismu muokslinīks – Sergejs Vasiļjevs.

Roksts sagataveits projekta “Latgales kultūrtelpa: problēmas, analīze un atspoguļojums portālā lakuga.lv” ītvorūs. Projektu finansej Medeju atbolsta fonds nu Latvejis vaļsts budžeta leidzekļu.