Roksta autors: portals lakuga.lv

Muokslinīks Ēriks Grosbergs izveiduojs kruosojamū gruomotu pīaugušajim “Spolvainuo mēle”, tymā īkļauti 33 lomu vuordi latgalīšu volūdā. Gruomota izveiduota ar mierki radeit jautreibu.

Portalam lakuga.lv muokslinīks Ēriks Grosbergs atkluoj, ka ideja par lomu vuordu gruomotys izveidi latgalīšu volūdā jam rodusēs, radzūt leidzeigys gruomotys cytuos volūduos. Par cylvākim, kuri lomojās i soka lītys, kas ir pretrunā ar pījimtū, soka, ka jim ir spolvaina mēle, nūruoda muokslinīks. Par tū ari gruomotai dūts itaids nūsaukums – “Spolvainuo mēle”. Tei izveiduota kai kruosojamuo gruomota pīaugušajim, ītverūt 33 lomu vuordus latgalīšu volūdā.

Atrast vuordus nabejs vīgli, tū latgaliski naasūt nimoz tik daudz. Latgalīšu lomu vuordus Ēriks mekliejs internetā, dažaidūs rokstūs i komentarūs. “Ar lomu vuordim cylvāki parosti nasalīlej, laikam ar lomuvuordu gruomotom ari nā. Ituos gruomotys aizdavums ir ceļt jautreibys leimini. Par kū gon naīkruosuot sovys dīnys ar cytaidim vuordim?” soka Ēriks.

Gruomota pagaidom nav publicāta klasiskā gruomotys veidā, kotru eksemplaru speciali izdrukoj konkretam pierciejam. Tok Ēriks īceriejs “Spolvainū mēli” izdūt ari drukuotā veidā. Muokslinīks struodoj pi vēļ vīna latgaliska projekta, kruosojamuos latgalīšu ābecis aba lementera. Tymā pasaruodeis Kolupam, kas ir Ērika dzymtuo puse, rakstureigi vuordi.

Ērika Grosberga daiļradei leidza var sekuot facebook.com/gleznukalns i instagram.com/gleznukalns

Gruomotu var nūpierkt gleznukalns.myshopify.coms.

Kai skaņ latgalīšu lomuvuordi, var pasaklauseit latgalīšu volūdys apvuiceibys video.

Roksts sagataveits projektā “Latgales kultūrtelpa: problēmas, analīze un atspoguļojums portālā lakuga.lv”. Projektu finansej Medeju atbolsta fonds nu Latvejis vaļsts budžeta leidzekļu.