Rokstu sagataveja: portals lakuga.lv

“Varang Nord” ir metalmuzykys grupa nu Daugovpiļs, kas plašuoku atpazeistameibu īgiva 2019. godā ar uzvaru pasauļa leluokajā metalmuzykys konkursā “Wacken Open Air” ar dzīsmi “Stuojīs!”. Itūreiz grupa klauseituojim pīduovoj jaunu dzīsmi i videoklipu “Svietņeica”.  

Grupys jaunuos dzīsmis “Svietņeica” i tuos video centralais tāls ir mežs. “Varang Nord” dalinīki stuosta, ka dzīsme viestej par mežu kai svātū vītu, kur cylvāks atīt nu īrostuo. “Mežā cylvāks nikod nav vīns, jam vysod sekoj dīvi. Tys ir augšuoku spāku pasauļs, kur kūki ir svietneicys kolonys, meža skanis ir tuo himna. Latgolā, kurai veļteits tūpūšais albums “Pārķiuņa uomurs”, ir daudz mežu. Var saceit, ka tei ir leluo svietneica, kura vysod ir kluot,” skaidroj “Varang Nord”.

Grupa leidz šam ir izdavuse div albumus i div mozalbumus. “Varang Nord” portalam lakuga.lv atkluoj, ka jaunuokuo albuma “Pārķiuņa uomurs” īroksts jau ir pabeigts. “Atlics tikai vysu nūformēt i prezentēt. Albumā īguļdeits vairuok spāka, tys byus īspaideiguoks par īprīkšejim grupys dorbim,” stuosta “Varang Nord”. Īskotu albumā “Pārķiuņa uomurs” var giut, nūsaklausūt dzīsmis “Stuojīs!” i “Svietņeica”.

Grupa “Varang Nord” dorbojās jau nu 2014. goda. Vysi grupys dalinīki īt nu Latgolys i dzīd latgaliski. “Varang Nord” jau īprīkš portalam lakuga.lv saceja, ka jim tys ir svareigi. “Pat Latvejā smoguos muzykys izpiļdeituoju vydā nav daudz, kas dzīduotu latgaliski, i par pasauli pat nav vārts runuot. Dzīžūt latgaliski, mes izceļam sevi i nasam Latvejis i Latgolys vuordu pasaulī,” soka grupys dalinīki.

Grupa itūgod planavoj na tikai prezentēt jaunū albumu i atsuokt koncertēt, bet ari dūtīs Eiropys tūrī ar grupom “Arkona”, “TYR” i “Dalriada”. Tok grupa atzeist, ka, jamūt vārā naskaidrū situaceju ar koronavirusu, vysi plāni var maineitīs.