Roksta auotors: portals lakuga.lv

7. novembrī nūtiks Catūrtais pasauļa diktats latgalīšu rokstu volūdā. Tys skanēs Latvejis Radejis 5 jaunīšu raidejumā “Pīci breinumi”, kai ari multimedialā formatā byus daīmams Sabīdriskūs medeju portalā lsm.lv, “Latgalīšu kulturys ziņu portalā lakuga.lv” i socialajūs teiklūs. Diktatu organizej “Latgalīšu kulturys ziņu portals lakuga.lv” i Latvejis Radejis Latgolys studeja. Itūgod diktatā skanēs latgalīšu jūki, i tūs diktēs Latvejis “Instagram” zvaigzne Lauris Zalāns.

Ideja par diktatu latgalīšu volūdā roduos portala lakuga.lv redaktorei Vinetai Vilcānei 2017. godā, i itūgod diktats nūtiks jau caturtū reizi. Pasauļa diktata latgalīšu rokstu volūdā mierkis ir aktualizēt latgalīšu volūdys lītuojumu i pīvērst sabīdreibys uzmaneibu raksteitprasmei latgaliski.

“Eipaši gribim aktualizēt raksteitprasmi godūs jaunu cylvāku vydā, partū itūgod asam mainejuši diktata formatu, padorūt tū atraktivuoku i jaunīšim interesantuoku. Īprīkšejūs godūs tyka skaiteiti latgalīšu autoru daildorbu fragmenti, sovukuort itūgod Catūrtajā pasauļa diktatā latgalīšu rokstu volūdā skanēs anekdoti. Humors ir naatjamama latgalīšu identitatis daļa, caur tū var atkluot latgalīšu volūdys boguoteibu i paruodeit volūdys skaniejumu,” soka latgalīšu portala lakuga.lv redaktore Vineta Vilcāne.

Diktats skanēs 7. novembrī 16 stuņdēs jaunīšu raidejumā “Pīci breinumi” vysuos Latvejis Radejis 5 frekveņcēs, tū varēs klauseitīs ari škārsteikla platformuos pieci.lv i lsm.lv, kai ari Latvejis Radejis Latgolys studejis i portala lakuga.lv kontūs socialajūs medejūs. Pīraksteitū tekstu varēs puorbaudeit latgalīšu portalā lakuga.lv. Itūgod diktatu skaiteis radejis personeiba, pasuokumu vadeituojs i vīnkuoršais latgalīts Lauris Zalāns. Diktata teksts sagataveits, īvārojūt 2007. godā apstyprynuotūs Latgalīšu raksteibys nūsacejumus.

“Latgalīšu kulturys ziņu portals lakuga.lv” ir pasaulī vīneigais medejs, kura saturs ir tikai latgaliski. Portals dorbojās nu 2007. gods, i tū uztur bīdreiba “LgSC”.

“Raidejums “Pīci breinumi” itūšaļt ir vīneigais regulari skanūšais jaunīšu raidejums latgalīšu volūdā, kas nu 2018. gods ik nedeli dzieržams sabīdriskuo medeja Latvejis Radejis 5 viļņūs. Raidejuma mierkis ir īsaisteit jaunīšus sev interesejūša satura radeišonā i latgalīšu volūdys populariziešonā,” soka Latvejis Radejis Latgolys studejis vadeituoja Renāte Lazdiņa.

Diktatu finansiali atbolsta Latvejis Radeja i bīdreiba “LgSC” (projekts “Mozuoklītuotuos volūdys, leluos īspiejis. Sadarbeiba pietnīceibā, kūpīnu īsaisteišona i inovativi vuiceišonuos reiki – COLING” (projekta leigums Nr. 778384)).