Sagataveja: portals lakuga.lv

Šudiņ, Latgolys kongresa dīnā, muzykalu kūpdorbu prezentej muziki Arņs Slobožanins (grupa “Dabasu Durovys) i muzikis “Weron Martin”, kuram itei dzīsme ir ari atsagrīzšona latgaliskajā muzykā piec 15 godu pauzis.

Weron Martin (eistajā vuordā Verners Martinovs) latgaliskajā muzykā tyka zynoms pyrma 15 godu, kod, sasadorbojūt ar basgitaristu Ingaru Viļumu, tyka izdūtys dzīsmis “Dabasi raud” i “Pasoki maņ”. Da ituo Weron Martin ir dorbojīs dažaidūs muzykys projektūs, nu šudiņ, 27. aprelī, kūpā ar sovu lobu draugu i grupys “Dabasu Durovys” lideri Arni Slobožaninu, atsagrīž Latgolys muzykā ar kūpā radeitū dzīsmi “Muni pādi nava svāti”.

Jaunuos dzīsmis rasšonuos stuosts ir obeju draugu sasatikšona piec vaira nikai desmit godu puortraukuma, kod izrunuots par itymā laikā pīdzeivuotū, dabuotū kruosainū pīredzi, atkluojūt dzeivē īsavuiceitū i kūpeigi teikūt pi sacynuojuma – kab i kaidi laiki guojuši, kaidi dorbi dareiti i nadorbi sastruoduoti, svareiguokais vys tik nav pasamainejs – pasauļa sapyni vys vēļ ir palykuši tī poši. Muziki aicynoj – ir juotic sev, juoturpynoj sovs ceļš i nav juouzatrauc, kū dūmuos voi saceis apleicejī – mums nivīnam nav tīseibu tīsuot voi nūsūdeit cytus, jo: “…muni pādi nava svāti, taipat kai tovejī.”

Dzīsmis “Muni pādi nava svāti” autori ir obeji muziki – Arņs Slobožanins i Weron Martin, dzīsmis teksta īdviesme pasmalta Valentina Lukaševiča dzejis kruojuma “Pādi navā svāti” nūsaukumā. Dzīsmis producents ir aranžātuojs ir Mārcis Vasilevskis, bungys īspieliejs Kaspars Pļavnieks, bet teksta video autors ir Ēriks Saksons.