Rokstu sagataveja: portals lakuga.lv

Latvejis školuos vuiceibu gods tyvojās nūslāgumam, par gūdu tam grupa “Latgalīšu Reps” vysim školānim i tūpūšajim absolventim duovynoj animātu videoklipu dzīsmei “Škola atā”.

Dzīsme “Škola atā” ir vīna nu kompoziceju “Latgalīšu Repa” ūtrajā albumā “Cyta dzela”. Tuos videoklips veiduots sadarbeibā ar muokslinīku Tomu Markovu. Dzīsmis klips ir par školys laiku, par pīdzeivuojumim, atgadejumim i sacynuojumim.

“Škola atā” liriku video klips kotram, kas vēļ vuicuos voi dreiži jau absolvēs školu, izraiseis nostalgejis sajiutu deļ tam, ka atainoj školys laikus – nagulātuos nakts, klasis balleitis, pyrmū mīlesteibu i jauneibys vīglpruoteibu.

Grupys “Latgalīšu Reps” dalinīki Ivo i Didzis atzeist: “Kas beja aktuals mums, vairs nav aktuals jaunajai paaudzei, tok namaineigs palīk tys, ka piec školys absolviešonys suocās dzeivis škola.”

Animātuo videoklipa autors ir Toms Markovs. Grupys “Latgalīšu Reps” sadarbeiba ar muokslinīku nu Jelgovys ilgst jau vairuokus godus, tok itys klips ir īspaideiguokais nu kūpdorbu. Namaineigi grupys stiļam, videoklipā ir radzamys ainys nu Ivo i Didža dzymtuos piļsātys Ludzys.

Vaira par “Latgalīšu Repa” ūtrū albumu “Cyta dzela” var skaiteit ITE.