Rokstu i video sagataveja: portals lakugalv

Portals lakuga.lv video raidejumā “Kulturys viests” turpynoj viesteit par latgaliskuos kulturys procesim, pīduovojūt īsavieršonu septembra nūtikšonuos. Jaunuokajā raidejumā par Nikodema Rancāna bolvu izcyluokajim Latgolys pedagogim, apvīneibys “Latgalīšu Reps” verseju dzīsmei “Auga, auga”, Upītes Uobeļduorza 20 godu jubileju, Rēzeknē nūtykušū seminaru, kas veļteits Latgolys kulturtelpys identitatei i cytom viestim.

Septembra nūtikšonys, par kurom viesteits raidejumā:

• Ar Nikodema Rancānu bolvu gūdynuoti izcyluokī Latgolys pedagogi;
• Festivals “Upītes Uobeļduorzs” nūsvietiejs 20 godu jubileju;
• Rēzeknē aizvadeits pyrmais nu treju pyrma 2022. godā paradzātuo Latgolys kongresa īcarātūs seminaru;
• Grupa “Latgalīšu Reps” pīduovoj sovu mysudīneigu verseju dzīsmei “Auga, auga rūžeņa”;
• Izdūta jauna gruomota bārnim latgaliski “Burtu vuoceleite”;
• “Ausmeņa Records” reperei Ūgai jauna dzīsme “Pīārs”;
• 130. dzimšonys dīnā atguoduota pyrmuos latgalīšu originallugys “Guņsgrāks” autore Konstance Daugule.

Itys ir pīktais nu itūgod planavuotūs sešu video raidejumu par latgaliskuos kulturys nūtikšonom. Raidejuma vadeituojs ir kinys “Piļsāta pi upis” golvonuos, Aņša lūmys atveiduotuojs Dāvis Suharevskis, video operators i montažys režisors Sergejs Čakāns, bet par video saturu pasaryupej portala lakuga.lv redakceja.

Kulturys ziņu eistynuošona ir projekta “Latgaliskā kultūrtelpa: problēmas, analīze, atspoguļojums portālā lakuga.lv” daļa, tū finaņsej Medeju atbolsta fonds nu Latvejis vaļsts budžeta leidzekļu. Par raidejuma saturu atbiļd latgalīšu kulturys ziņu portals lakuga.lv.

Portala lakuga.lv komanda soka paļdis par atsauceibu i atbolstu ziņu sataiseišonā raidejuma vadeituojam Dāvim Suharevskim, video operatoram i montažys režisoram Sergejam Čakānam, grafiku veiduotuojam Krišjānim Pleiko (Upes kinostudija) i Ivo Grigalim nu grupys “Latgalīšu Reps” par atļuovi izmontuot grupys dzīsmis “Muna dīna” fragmentu raidejuma dasacejumā.