Rokstu sagataveja: portals lakuga.lv

Nūsaslēdzs dorbs pi vierteigu Latgolys Televizejis sabīdreibys (1991–2000) video materialu apraksteišonys i digitaliziešonys, saglobojūt unikalys Atmūdys laika Latgolys kulturviesturiskūs nūtikšonu līceibys, padorūt tuos daīmamys sevkuram interesentam i veicynojūt pietejumu tapšonu iz prīšku, portalu lakuga.lv informej bīdreibys “ESTO” puorstuove Ilona Rupaine.

Pyrma 30 godu Latvejis TV eterā pyrmū reizi atskanēja vuordi “Eterā Latgoys televizeja!”, tai īzeimejūt pyrmuos regionaluos televizejis – Latgolys Televizejis sabīdreibys (LTS) dzymšonu. Desmit godu LTS beja latgaliskuos identitatis i vaļstiskuos naatkareibys medejs. Tuos eisais, nu spūdrais myužs lyka pamatus regionalūs televizeju teikla sataiseišonai, veicynuoja Latgolys kulturviesturiskuo montuojuma, latgalīšu volūdys apzynuošonu, saglobuošonu i atteisteibu. Latgolys Televizejis Muzykys festivali atkluoja daudzus talanteigus Latgolys i Latvejis izpiļdeituojus, puļcejūt klauseituoju tyukstūšys Rēzeknē i Daugovpilī, prīcejūt i puorsteidzūt Latvejis Televizejis tīšraidis koncertu skateituojus.

Līceibys par 90. godu Latvejis Atmūdys pyrmuos desmgadis laiku video formatā ir sasaglobuojušys cīši moz, deltuo, svietejūt LTS jubileju, cylvālu grupa, kas beja itai kompanejai pīdareiga, apzynuoja privatajūs arhivūs vēļ atrūnomūs materialus, kab padareitu tūs izpēti, atlasei i vierteiguokū failu puorraksteišonu myusdīneigūs datu nesiejūs. Rezultatā tyka digitalizāts vaira nakai 30 stuņžu gars video materials, kurā radzamys unikalys kulturviesturiskys nūtikšonys i personeibys, daudzys latgaliskuos i katuoliskuos aktivitatis, intervejis, diskusejis LTS Muzykys festivalu koncertu i dīnysgruomotu fragmenti. Digitalizātuo materiala vydā ir Lenina pīminekļa demontaža Rēzeknē 1991. goda augustā, dažaidu omotu pratieju stuosti – rudzu maizi cepšona, cyuku bēris, lynu i buļbu tolkys, bucu taiseišona, maja dzīduojumi, pierts tradicejis, mutis garmanis spēle, sarunys ar Andryva Jūrdža mantinīkim, dzejnīku Ontonu Kūkuoju, kordirigenti Terēziju Broku, dzejnīku Eugenu Karūdznīku, ASV latgalīti Konstantinu Sventecki, dirigentu Ontonu Matvejānu, rakstnīku Juoni Klīdzēju, dzejneicu Bronislavu Martuževu i daudzim cytim.

LTS materialu apkūpuošonys i apzynuošonys dorbu organizēja bīdreiba “ESTO’, tūs izpēti, daudzu desmitu failu aprokstu i digitaliziešonu dareja bejušais Latgolys Televizejis sabīdreibys kulturys raidejumu, tūs vydā ari kulturys programys “Olūti, redaktors Voldemārs Ivdris i režisors-operators Māris Justs. Kab saglobuotuos līceibys byutu daīmamys kotram interesentam, digitializātī materiali dreižumā tiks nūdūti Latvejis Nacionaluo arhiva Latvejis Vaļsts kinofotofonodokumentu arhivam (LVKFFDA), eipašys tematiskuos kolekcejis sataiseišonai, kurei jau 2022. godā byus apsaverama LVKFFDA datubazē http://redzidzirdilatviju.lv.

Video materialu digitaliziešona padareita ar Latgolys kulturys programys Latgolys regiona atteisteibys agenturys, Vaļsts kulturkapitala fonda i A/S “Latvijas valsts meži” – finansialu atbolstu.

Muzykalī “Olūti”. Videomaterialu kūpa nu vairuoku raidejumu: Aizgavieņs, Pītera dīna, kuozys Atašīnē, pierts vokors Makašānūs, kors “Austrenis” i buļbu tolka Baļtinovā.