Rokstu sagataveja: portals lakuga.lv

Jau deveitū reizi izguojuse etnomuzykys izlase “Sviests”, kurymā reizi divejūs godūs teik apkūpuoti dažaidu apvīneibu i solo muokslinīku radeitī skaņdorbi, kurūs saklausoma tautys muzykys ītekme, viestej izdevnīcebys “Lauska” publicātuo informaceja. Itamā izlasē ir 20 gobolu, kurūs vydā ari četri skaņ latgaliski voi tūs radeišonā īdviesme bejuse Latgola.

Izlasē īkļautūs skaņdorbu vydā var dzierdēt jau cīši labi Latvejis muzykā zynomuos grupys “Tautumeitas” speciali tautys deju ansambļa “Vektors” dejis horeografejai radeitū Aulejis dzīsmis “Brosnej, puika, tū dzeršonu” verseju.

Apvīneiba “TKP” (atšifriejumā “tā kā pērn”), kurā apsavīnuojuši Ēriks Zeps i Julgī Stalte “Sviests 9” pīduovoj nūsaklauseit skaņdorbu “Suņi” – tymā sasavej latvīšu i latgalīšu volūda i cīši tycams, ka itaida leimiņa īrokstā obejis volūdys sasateik pyrmū reizi, kas ir interesnuokais – lībīšus puorstuovūšuo Julgī dzīd latgaliski, sovpus Ēriks, kurs īt nu Varakļuonu, lībiski.

Vēļ vīna lībiskuo i latgaliskuo sasatikšona simboliski ir car apvīneibu “JŌRA” (nu lībīšu volūdys – azars) dzīsmē “Oj, agri”. Apvīneiba 2019. goda golā seve dasaceja kai trio TRE, bet niu dorbojās kai “JŌRA” i tuos repertuaru veidoj kai latvīšu, tai cytu tautu (leluokā tīsā skandinavu) tradicionalūs melodeju aranžiejumi, taipat lela lūma jūs muzykā ir ari improvicacejai.

Etnomuzykys izlasē “Sviests 9” atrūnoms ari skaņdorbs zam nūsaukuma “Vonogu dancs”, kurū īspieļuojuse kaida apvīneiba “FOLK 7”. Izaruod, ka aiz tuos globojās kuliņu i bungu grupys “Auļi” i grupys “Raxtu Raxti” dalinīka Edgara Kārkļa ideja i apsavīnuošona ar cytim nu Leivuona īmūšim muzikim: Kristīni Kārkli-Kalniņu i Gati Valteru. Jim pīsavīnuojuši vēļ vairuoki Latvejā pazeistami muziki, ar kurim Edgars da ituo ir sasadorbuojs dažaidūs sastuovūs. Skaņdorbam dūts “Vonogu daņča” nūsaukums, jo Vonogūs vaicojamys Kārkļu saimis saknis, i itei ir Edgara improvizaceja i sajiuta par itū vītu i tuos nūskaņom. Sovulaik Vonogūs dažaidus muzykys instrumentus spieļuojuši kotrā saimē, kuliņu vys tī naasūt bejs, aiz tuo tuos skanūt niu.

Kai portalam lakuga.lv pīzeist izdevnīceibys “Lauska” vadeituojs Juris Zalāns, niu jau saneitais deveitais “Sviests” (latgaliski raksteitu “Svīksts”) ir itūs kovida godu rezultats. Jau īrosts, ka izlase izīt reizi divejūs godūs, nu pandemejis deļ tuos izīšona nu pārnejuo goda puorsacāluse iz itū. Etnomuzykys izlase simboliski paruoda ari ituo laika sovpateibu – sasatikšonys i kūpā muziciešonys deļ rodušīs vairuoki solo projekti, bet izlasē asūšūs muziķu vydā pamatā ir tī, kurī kūpā spieļuoj jau senejuok – jaunu apvīneibu sasarošana itymā laikā beja pagryutuoka. Ka “Sviests 8” bejušys ari vairuokys latvīšu muziķu sadarbeibys ar uorzemu muzikim, “Sviests 9” ir pošu saneits – tuos pošys pandemejis deļ muzikim mozuok saguojs sabyut pasaulī, kab sasatiktu ar cytu vaļstu muzikim i rostūs jauni kūpdorbi.

“Sviests 9” izaceļ ari ar skaniejuma tehniskū rysynuojumu – vysi skaņdorbi samiksāti eipašajā “Dolby Atmos” versejā, kas ar attīceigu aparaturu ļaun izlasi klauseitīs gondreiž kai treijuos dimensejuos.

Etnomuzykys izlasi “Sviests 9” var klauseitīs popularuokajuos muzykys straumiešonys vītnēs, bet CD albuma formatā var pasyuteit izdevnīceibys “Lauska” sātyslopā ITE.