Rokstu sagataveja: portals lakuga.lv

Kulturys īsacejumus itai nedeļai sagatavejuse Jūlija aba @Aizskriejushuo, kai jū zyna daudzi tvitera lītuotuoji. Beidzamajūs godūs taišni jei ir vīna nu aktivuokūs tvītuotuoju latgaliski. Vīnojūšais Jūlijis īsacejumūs ir īsaklauseišona cylvāku stuostūs. Īsaklauseit, sadzierdēt i pajimt koč kaidu gabaleņu sovys izaugsmis mozaikai.

“Puslopys”

Studejūt uorzemēs, šaļtim cīši datryukst dzymtuos volūdys skanis, ari, ka koč puors reizis nedelā saīt pīzvaneit bruoļam i mamai i drupeit parunuot. Tū es puorsvorā rysynoju, klausūtīs LR Latgolys studejis īrokstus Spotify, i muns favorits ir “Puslopys”. Beidzamajūs godys ceņšūs puorskaiteit kotru jaunū gruomotu latgaliski, kū varu dabuot i, klausūtīs “Puslopys” īprīšk puorskaiteitūs gruomotu pīredzis daboj jaunu dimenseju – var īraudzeit, kū dūmoj autors, kas mums ir kūpeigs, i kū es varu nu juo īsavuiceit.

Im a’mazed

Ka “Puslopys” es klausūs, asūt garuokā pastaigā voi braucūt ar viļcīni, tod kūpmītnēs es verūs Im a’mazed. Ituo YouTube kanala skatejumu ziņā popularuokī video ir sereja par kokčiku jaukšonu, bet es poša jū verūs garūs podkastu aba raidīrokstu video dieļ. Parunuošona par aktualom lītom ir ideals leidzeklis pret vīntuleibu vokorūs, bet, ka nav ar kū tamā dīnā sasatikt, tod paleigā īt BezTalkOFF, kur īroksta dalinīki runoj par Zylupis viļcīni, socialajim teiklim i emocionalū lobsajiutu. Ceru, ka kanala satura veiduotuoji nav pamatuši raidīroksta formatu i turpynuos publicēt taidus īrokstus.

Akvareja radeja

Vuicūtīs i rokstūt bakalaura dorbu, maņ vajadzēja taidu muzyku, kas ir pīteikūši interesna, lai nasagrybātu nūvērst uzmaneibu iz cytom lītom, bet vīnlaiceigi ari tikai instrumentala, lai dūmys palīk pi raksteišonys. Komponista Galena Tiptona albums “Nymph Tones” (kū es īsauču par “akvareja radeju” zamiudiņa nūskaņu dieļ) cīši labi piļdeja itū aizdavumu. Gribīs saceit, ka skaņ kai kaleidoskops, kai kaida akvareja stuosts.