Rokstu sagataveja: portals lakuga.lv

Jaunumi muzykā latgaliski vysleidza nav kotrys dīnys nūtykums, tok itūreiz nav viņ stuosts par vīnu dzīsmi, a vasalu grupu. Izaruod, ka grupa “Reibums”, par kurū ir itys stuosts, izaveiduojuse jau 2020. godā. Leidz šam grupai ir bejs puora koncertu, tok pandemeja naļuovuse piļneibā izapaust.

Grupa “Reibums” īt nu Rēzeknis nūvoda Kaunatys pogosta. Kai stuosta poši grupys dalinīki, itūšaļt grupā spieļoj treis cylvāki – Vitaļs (gitara i vokals), Imants (basgitara i vokals) i Valers (bungys). Grupa rodusēs jau 2020. godā, kod treis draugi nūlāmuši reizi pa reizei sasatikt, kab uzspieļuot muzyku. Suokuos puišim nabeja atsevišku plānu “veiduot grupu”, tok piec puora mieginuojumu jī izlēme, ka vajag uzspieļuot kaidu koncertu, i tai tei līta aizguojuse.

Grupys “Reibums” repertuara pamatā ir ļusteigys dzīsmys, kurys teik izpiļdeitys latgaliski, partū ka tei ir volūda, kurā kasdīnā runoj vysi grupys dalinīki, i, kai soka poši puiši, spieļuot muzyku latgaliski redzīs dabeigi.

Cikom leluokuo daļa grupys dzīšmu ir uorzemu grupu kaverversejis. Dažys dzīsmis ir “aizajimtys” nu uorzemu grupu, vuordus puorlīkūt latgaliski. Tok grupai ir ari sovys dzīsmis i teik raudzeits reizi mienesī publicēt pa vīnam jaunam īrokstam.

Kai īsmej poši grupys dalinīki: “Mes izalosam tuos dzīsmis, kurys pateik pošim. Naasam perfekcionisti – ka dzīsmei ir treis akordi, mes lobuok spieļuosim tū dzīsmi, kurai ir divi akordi”. Grupa vēļ cikom naplānoj startēt “Eirovizejā”, sovu ceļu suoks ar koncertim Latgolā. “Reibums” mierkis ir spieļuot lobu muzyku i īprīcynuot publiku, varbyut tikt ari leidz tam, kab kotrys mieginuojums nav bejs veļteigs, tok teik izdareits koč kas produktivs.

Itū pīktdiņ, 10. majā, ostoņuos stuņdēs vokorā grupa uzastuos Rēzeknis “Ausmeņa kebabs” kopejneicā (N. Rancana īla 41, Rēzekne).

Sovpus grupys aktivitatem var sekuot leidza jūs Facebook lopā ITE, i jūs Instagram profilā ITE.