Rokstu sagataveja: portals lakuga.lv

Nu 3. da 9. juļa Latvejis Universitatis Humanitarūs zynuotņu fakultatis folkloristikys nūzaris pietnīki i folklorā īinteresāti studenti profesoris Janīnys Kursītis-Pakulis vadeibā brauks tradicionaluos kulturys i mutvuordu viesturis ekspedicejā iz Latgolu  – itūreiz iz Bolvu nūvoda Viļakys apleicīni, viestej informaceja fakultatis sātyslopā.

Latvejis Universitatis folkloristu zynuotniskuos ekspedicejis nūteik jau vaira nakai 20 godu. Nu 1999. goda Latvejis Universitatis vuiceibspāki, leidza jamūt nuokušūs pietnīkus – studentus i doktorantus, ir pabejuši Alsungys, Dundagys, Kuldeigys, Nīcys, Rucavys, Saldus nūvodūs Kūrzemē, Valkys nūvodā pi vydzemnīku, Bauskys nūvodā Zemgalē, ari Sunākstis, Secis i Vīseitis pogostūs Sielejā, vairuokys reizis Latgolā – Dagdys, Daugovpiļs, Kuorsovys, Vuorkovys, Preiļu, Leivuona nūvodā i cytur. Bolstūtīs ekspedicejuos pīradzātajā i savuoktajā, izveiduoti ari vairuoki rokstu kruojumi, jaunuokī – “Diždundaga. Apcerējumi par Dundagas novadu”, “Daugavpils novads: vietas vērtība”.

Piec div godu puortraukuma, kam īmeslis beja pandemeja, LU pietnīki i studenti ar lelu prīcu i interesi otkon gatavejās ekspedicejai. Itūreiz par ekspedicejis vītu izvālāta Bolvu nūvoda Viļaka i tuos tyvuokuo apleicīne. Bolvu nūvods pīsaistejs ar folklorys kūpom, ausšonys, rūkdorbu tradicionalajom prasmem, stuosteišonys tradicejom. Folklorys ekspedicejis dalinīkus interesej na tik folklorys tradiceju kūpieji, bet sevkurs dzeivuotuojs, kam tyvys kaidys tradicionaluos prasmis (rūkdorbi, amatnīceiba, muziciešona, tautys dzīdnīceiba, kulinaruos tradicejis), latvyskūs īražu, ticiejumu, nūstuostu zynuotuoji voi vīnkuorši leli stuostnīki ar boguotu dzeivis pīredzi. Ekspedicejis dalinīku interešu lūkā ir ari na tik senejuos viesturis – 1980. – 1990. godu nūtikšonys. Ekspedicejā LU pietnīku grupai pīsavīnuos Reigys Muokslys i medeju tehnikuma tūpūšī videooperatori, kab video sižetūs fiksātu ekspedicejis gaitu.

Latvejis Universitatis ekspedicejis jau nu pošu pyrmsuokumu nūteik sadarbeibā ar mutvuordu viesturis pietnīkim, i vysys ekspedicejuos pīraksteituos intervejis piec ekspedicejis tiks nūdūtys globuošonai Latvejis Universitatis Nacionalajā Mutvuordu viesturis arhivā.

6. julī 19.00 stuņdēs Viļakys Vaļsts gimnazejā nūtiks kūpeigs vītejūs folklorys kūpu (pīsadola “Atzele”, “Abrenīte” i “Egle”) i ekspedicejis dalinīku vakariešonys i sasadzīduošonys pasuokums, iz kuru aicynuoti vysi apleicīnis ļauds.

Ka ekspedicejā labi veiksīs, cytugod tei tīpat tiks turpynuota, kab piec div godu dorba varātu sagataveit gruomotu.