Augustā Rēzeknē nūtiks Latgolys stuostnīku festivals “Omotu stuosti”
Rokstu sagataveja: portals lakuga.lv
5. i 6. augustā stuostnīki nu vysu Latvejis nūvodu teik aicynuoti iz Rēzekni, kur nūtiks VII Latgolys stuostnīku festivals “Omotu stuosti”, viestej informaceja Rēzeknis Centraluos bibliotekys sātyslopā.
Vīns nu Latgolys stuostnīku festivala aizdavumu ir veiduot atpazeistamu i rodūšu platformu Latgolys amatnīceibys izzynuošonai i populariziešonai. Īprīškejūs godūs tymā īpazeiti pūdnīka, kuozu saimineicys, dravnīka, kludzeņu pinieja, audieja, stykla pyutieja omoti. Itūreiz festivalā pīsavērss uodys apstruodis i darynuojumu meistaru omotam, stuosteis par tuo pratiejim, vērsīs, kai nūteik uodys apstruodis process i cik plotys uodys izstruoduojumu izmontuošonys vareibys ir myusu sadzeivē.
Festivala eipašī gosti – etnomuzikologs, muokslys zynuotņu doktors, Latvejis Universitatis profesors Valdis Muktupāvels ar lekceju “Dūdas, bungas, pātadziņa: tautas mūzikas instrumenti un āda kā izejmateriāls”, Zane Dukaļska ar bubyna spēlis meistarklasi, folklorys kūpa “Vīteri”, tok saiminīku lūmai atsasaukuse amatnīku darbneica “Apkalnmājas” (Irēna Baufale), uodys izstruoduojumu darbneica “Kristāla kurpīte” (Andris Kačkāns), Latgolys Kulturviesturis muzejs (Renāte Ničiporčika), Rēzeknis TAC i Rēzeknis Centraluo biblioteka.
Lelajā stuostu vokorā “Vakardīnys nadadzeisi, nu reitdīnys naaizbiegsi!” byus vareiba dzierdēt stuostnīkus nu vysaidu Latvejis nūvodu, atškireigys izlūksnis i plotu stuostu spektru – puosokys, atmiņu i viesturis stuostus, anekdotus i jautrūs stuostus. Muzykalais pavadejums – atraktivuo folklorys kūpa “Vīteri”.
Kab pīsadaleitu festivalā kai dalinīks, tam juodasasoka da 20. juļa. Tok atkluotūs pasuokumus, kas nūtiks Rēzeknis piļsātys svātku laikā, varēs apmeklēt sevkurs interesents bez moksys. Vaira informacejis par festivālu var dabuot, zvonūt festivala reikuotuojai, Rēzeknis Centraluos bibliotekys direktorei Rutai Susejai (29446654) voi Latgolys stuostnīku festivala koordinatorei Vilhelmīnei Jakimovai (29495394).
Festivalu finansiali atbolsta VKKF, Rēzeknis piļsātys dūme, Latvejis Stuostnīku asociaceja.
