Rokstu sagataveja: portals lakuga.lv

Jau itymā nedeļgolā (23.—24. julī) Rēzeknis i Ludzys nūvoda saiminīki gaideis gostus iz Sātys kopejneicu dīnom, kurymuos byus vareiba baudeit na viņ latgalīšu iedīņus, nu ari rodūšuos darbneicys, kulturys programu i Latgolys dobys pīduovuojumu.

Sātys kopejneicu dīnu vosorys maratons Latgolā jau ir par pusi. 23.—24. julī gostus gaideis Rēzeknis i Ludzys nūvoda saiminīki, sovpus 28.—29. augustā gordumus byus sagatavejuši Bolvu nūvoda saiminīki. Itys pasuokums ir eipašs ar tū, ka tymā pīsadola na viņ kasdīnā struodojūšys kopejneicys, tok ari vīnkuoršys saimisteibys, kurys itymūs datumūs palīk par eistom kopejneicom.

Sātys kopejneicys gostim pīduovuos na viņ eipašus gordumus, tok ari vysaida veida koncertus, ekskursejis i darbneicys. Par pīmāru, rodūšajā sātā “Leiceiši” (Rēzeknis nūvoda Drycānu pogostā) byus vareiba na viņ nūgaršuot čili i korstmaizis latgalīšu gaumē, tok ari īsasaisteit papeira līšonys darbneicuos, uora sporta spieļu izaicynuojumūs, apsavērt saimisteibys dzeivinīkus i nūpierkt kraklus ar Latgolys muokslinīku dorbim.

Kopejneica “Skaistuo Rāzna” (Rēzeknis nūvoda Kaunatys pogostā) pīduovuos Rāznys azara zyvu zupu, captys i kapceitys Rāznys zivs i Rāznys kļockys soldonuo kriejuma mērcē.

Sovpus Bieržgaļa muižys gordumu goldā (Rēzeknis nūvoda Bieržgaļa pogostā) paraleli grūbu salatim, gordai maizis zupai i “Pavlovys” kūceņom byus vareiba izstaiguot parku i izzynuot interesantuokūs muižys laiku nūstuostus. Par muzykalū nūformiejumu pasaryupēs vītejī vokalī ansambli.
Dainys Duorznīku školā (Rēzeknis nūvoda Nautrānu pogostā) byus vareiba izstaiguot Dainys Zvejsalneicys duorzu i augu kolekceju i izzynuot vysaida veida padūmus, kai vīgļuok kūpt sovu duorzu lobumus. Byus vareiba nūgaršuot zupu, kurys recepte ir montuota nu Dainys mamys. Tok, suocūt jau nu 12 stuņžu, byus ari eipaša kulturys programa — dzīsmis i daņči ar Iļžukolna pogosta tautys noma folklorys kūpu ar Annu Viškeri, dzejis lasejumi nu Laurys Melnis i Ligijis Purinašys, sovpus 16 stuņdēs uzastuos Sovvaļņīks i Sintija Ludbuorža.

Ludzys pusē par kuorteigu izaiesšonu pasaryupēs Ludzys amatnīku centra kukne aba “Latgaļu kukņa”. Te byus vareiba izzynuot, kas ir batviniks, izgaršuot tradicionalū Ludzys putru, jaunuos buļbys, asuškys i cytus lobumus. Sovpus Sātys restoranā “Dzīles” (Ludzys nūvoda Malnovys pogostā) kūpā ar saimineicu Ainu Barsukovu byus vareiba īpazeit tradicionalūs Latgolys iedīņus, pagataveitus i pasnāgtus jaunuos formuos i garšu variacejuos.

Sātys kopejneicu dīnuos īsasaista ari aktivuos atpyutys pakolpuojumu snīdzieji uzjāmums “Atpūta Ludzā”. Te pīduovuos izbraucīni pa Zviergzdinis azaru, kū pavadeis Tihovsku saimis skaneiguos dzīsmis.
Tikom pošā pīrūbežā Leidumnīku kulturys centrā (Ludzys nūvoda Leidumnīku pogostā) byus sakluots pylns, suoteigs golds. Te svīsteņš, zapts i pošcapta maizeite garšoj taišni kai asūt gostūs pi babenis Latgolā. Byus vareiba īsaguoduot amatnīku produkceju, apsavērt, kai nūteik zuoleišu pakluoju ausšona, pagasteit kaļvē i kapelā.

Vysu plotū sātys kopejneicu pīduovuojumu 23.—24. julī var apsavērt ITE, sovpus ITE ir daīmama karte ar vysom kopejneicom i dažom apsavieršonys vītom, kab vīgļuok saplānuot sovu braucīni.

Cīši vālams vysmoz dīnu īprīšk pabreidynuot saiminīkus par sovu īsarasšonu, kab tim byutu vīgļuok planavuot gordumu apjūmus.