Rokstu sagataveja: portals lakuga.lv

Latvejis Radejis Latgolys studeja, kas atsarūn Rēzeknē, meklej kasnedelis radejis raidejuma vadeituoju, kam ir lobys latgalīšu volūdys zynuošonys i interese par procesim Latgolys regionā i vaļstī kūpumā.

Nu potencialuo kasnedelis raidejuma vadeituoja teik praseita loba latgalīšu sarunvolūda i zynuošonys latgalīšu rokstu volūdā, interese par nūtikšonom i procesim Latgolys regionā i vaļstī kūpumā, spieja kritiski i analistiki dūmuot, interese meklēt i atrast atbiļdis. Raidejuma vadeišona nav pylnys slūdzis dorbs, deļtuo tū var savīnuot ar asūšū dorbu. Pīsasaceit vakancei var, syutūt video formata dasacejumu, kurā teik pastuosteits par sevi, iz latgale@latvijasradio.lv.

Portalam lakuga.lv Latvejis Radejis Latgolys multimedeju studejis vadeituoja Renāte Lazdiņa stuosta, ka ar itū sludynuojumu teik maklāti papyldspāki asūšajim latgaliskajim raidejumim. “Ar itū sludynuojumu gribim papyldynuot studejis taiseitūs latgalīšu raidejumu komandys – cikom tys nav kaids konkrets raidejums. Raidejuma vadeituojam juobyut nu Latgolys ar īspieju kotru nedeļu voi kotru ūtrū nedeļu byut Rēzeknē. Dasacejumus gaideisim niu, augustā, tyvuokūs diveju nedeļu laikā, bet, ka ir interese, aicynojam sova dasacejuma atsyuteišonu cīši garai naviļkt,” tai Renāte Lazdiņa. Vaicuota, kai viertej situaceju vaļstī kūpumā ar latgaliski runojūšim žurnalistim i raidejumu vadeituojim, Renāte pīzeist, ka taidi specialisti ir, nu jūs ir moz i leluokuo daļa jau ir atroduši sovu vītu i labi struodoj. Renāte soka: “Raidejumu vadeišona prosa papyldu kompetencis i, ka runoj par radejis raidejumim, tod svareigs ir ari lobs bolss, tuo tembrys, volūdys “atspereigums”. Vysu lobuok byutu, ka tys ir cylvāks, kurs ir dzims Latgolā, itūšaļt ite ari dzeivoj, kab volūda byutu dabiska.”

Latvejis Radejis Latgolys multimedeju studeja, kas Rēzeknē tyka atkluota 2016. godā. Tuos aizdavums ir taiseit sižetus i raidejumus vysim pīcim Latvejis Radejis kanalim, viestejūt par nūtikšonom i procesim Latgolys regionā. Sūpluok ziņu sižetim i raidejumim latvīšu i krīvu volūduos, pastuoveigi teik pīduovuots saturs ari latgalīšu volūdā. Studejis komanda veidoj treis kasnedelis raidejumus latgaliski – informativi-analitiskū raidejumu “Latgolys stuņde” (skaņ pīktdīnem 15.05 Latgolys regiona apraidē i škārsteiklā), kulturys raidejumu “Kolnasāta” (skaņ sastdīnem 18.20 Latvejis Radejis 1. kanalā) i jaunīšu raidejumu “Pīci breinumi” (skaņ sastdīnem 16.00 Latvejis Radejis 5. kanalā). Taipat studeja veidoj myusdīnu latgalīšu literaturai veļteitū raidīrokstu “Puslopys”, kai ari paleidz īskaņuot myusu dīnu latgalīšu autoru dorbus – pārņ audio formatā tope Annelis Slišānis projekta “100dečiLatvijai” stuosti, kai ari sadarbeibā ar bīdreibu “LgSC” pyrmī radejis skaitejumi latgaliski – Ilzis Spergys stuostu kruojuma “Dzeiveiba” īskaņuojums.