Televizejis šovā “Īstās latvju saimnieces” pīsadola ari Latgolys saimineicys
Rokstu sagataveja: portals lakuga.lv
TV šovā “Īstās latvju saimnieces” jaunajā septeitajā sezonā, septenis saimineicys nu vysys Latvejis sasaceņš par šova golvonū bolvu i lobuokuos saimineicys titulu. Divejis nu septeņu saimineicu ir nu Latgolys – Anna Macāne nu Rēzeknis nūvoda Nagļu pogosta saimisteibys “Zvejnīki” i Nuora (Nora) Poiša nu Augšdaugovys nūvoda Salīnys pogosta Lelbornis muižys.
Saimineicu aizdavums raidejumā ir dabuot puorejūs saimineicu lobvieleibu i tikt pi vysvaira punktu, ruodūt sovu kulinarū meistareibu, kai ari prasmi izklaidēt gostus. Saimineica, kura sezonys beiguos byus dabuojuse vysleluokū atbolstu i vysvaira punktu nu puorejūs, sajims raidejuma golvonū bolvu i lobuokuos saimineicys titulu. Pyrmais raidejums Latvejis Televizejā jau paruodeits, tū īrokstā var nūsavērt ITE. Cyts raidejums gaidoms jau catūrtdiņ, 22. septembrī, 21.10.
Raidejumā sovys saimnīkuošonys i izklaidiešonys prasmis izruoda Anna Macāne nu Rēzeknis nūvoda, Nuora Poiša nu Augšdaugovys nūvoda, Elīna Cēsniece nu Jelgovys nūvoda, Vineta Cipe nu Amatys nūvoda, Ināra Zadaua nu Ūgris nūvoda, Sanita Matule nu Tukuma nūvoda i Iveta Celkarte nu Enguris nūvoda.
Kai stuosta saimineica Anna Macāne nu Nagļu, pyrma sovys pīsadaleišonys apstyprynuošonys jei apsadūmuojuse treis dīnys i tod pīkrytuse. “Pi myusu “Zvejnīkūs” ir kū paruodeit i pastuosteit, par kū maņ laist garum taidu lobu īspieju. Vysys puorejuos saimineicys beja cīši jaukys, es izbaudeju pīsadaleišonu itymā šovā.”
Sovpus Nora Poiša nu Lielbornis muižys pīsadaleit šovā pīkryta iz reizis, bez eipašys apsadūmuošonys. “Mani šovam īsaceja Malnovys maizneicys “Dzīļu” saimineica Aina Barsukova, i es kai avantūriskys cylvāks par reizi ari pīkrytu, nūteikti nanūžāloju, beja cīši interesna,” tai Nuora Poiša.
Atguodynojam, ka īprīškejā sezonā šovā “Īstās latvju saimnieces” uzvarēja Viola Anna Bīriņa nu Rēzeknis nūvoda keramikys darbneicys “Cukrasāta”, bet vēļ pyrma tuo, 2017. godā, kai uzvarātuoja šovu nūslāguse ari Kruoslovys nūvoda zyrgu sātys “Klajumi” saimineica Ilze Stabulniece.
