Rokstu sagataveja: portals lakuga.lv

“Ir īsasuocs oktobris, kurs jau vaira nakai godu symtu ir Rūžukrūņa mieness vysā Bazneicā. 7. oktobrī aicynoju apmeklēt Svātuos Misis sovuos draudzēs, kod Bazneica svinēs Rūžukrūņa Dīvmuotis svātkus,” tai itūnedēļ sovu kulturys īsacejumu stuostu aizsuoc Latgolā labi zynomais muzykants Aldis Kise.

Dažaiduos izstuodis Rēzeknis kulturys vītuos

Nu 3. oktobra Rēzeknis bibliotekuos byus apsaveramys vairuokys izstuodis. Eipaši īsaceitu apmeklēt Jēkaba Slišāna karikaturu izstuodi “UpītieDzeiveJauka”, kurys autors ir divpadsmitgadeigais puika, munys dzymtys kūka porstuovs. Tei byus apsaverama Rēzeknis Bārnu bibliotekā. Sovpus Centralajā bibliotekā muokslineicys Viktorijis Grappys gleznu izstuodē “Rēzeknes novada sakrālais mantojums” varēs redzēt divdesmit nūvoda dīvnomus akvareļtehnikā. Ari par vierteigu skaitu Pītera Korsaka fotoizstuodi “Latgales baltajos lielceļos sastaptie”, kura byus vaļā nu 5. oktobra Latgolys Kulturviesturis muzejā. Ir labi kotram pazeit Latgolys lelceļūs satyktuos personeibys – Pīters Zeile, Evalds Vasilevskis, Bronislava Martuževa, Juoņs Streičs, kai ari taipat munys dzymtys kūka dyžais zors Bronislavs Spridzāns.

Jaunuo i apduovynuotuo varganista Oskara Kalniņa uzastuošona

Ar 6. oktobri īsasuoks vargaņu festivals “ORGANismi”. Taišni atkluošonys koncerta suokumā ari uzastuos, pa manim, vārā jamams jaunīts ar Sarkaņu dzymtys saknem – Oskars Kalniņš, kurs vuicuos vargaņu spēli Jiurmolys muzykys vydsškolā pi prof. T. Dekšņa dzeivisbīdris Edītis Alpis-Deksnis i tikū vosorā uzvarēja storptautyskajā jaunūs varganistu konkursā. Cīši apduovynuots i harismatisks jaunīts, kurs koncertā spieļuos sovys improvizacejis! Tys ir uorkuorteigi sarežgeits žanrs i Latvejā ir kas cīši eipašs, jo ratais pat vodūšais varganists uzadreikst improvizēt.

Svātdīne bazneicai

Vysbeidzūt, 8. oktobrī, kai kotru svātdīni, duorgī kristīši, ejit kotrys iz sovu bazneicu pasateikt Dīvam par mīru myusu zemē, sajimtajom žielesteibom, aizlyugt par aktualū i suopeigū, sasatikt ar Dīvu i cylvākim.