Leivuonā apsaverama Sandrys Vigulis tekstildorbu izstuode “Myužeigais dziniejs”
Rokstu sagataveja: portals lakuga.lv
Nu 1. decembra leidz 31. janvaram Leivuona stykla i amatnīceibys centrā apsaverama tautys lītiškuos muokslys studejis “Dubna” daiļamatneicys-rūkdarbneicys Sandrys Vigulis izstuode “Myužeigais dziniejs”, kurā eksponāti dorbi vysaiduos tehnikuos, viestej publiski daīmamuo informaceja.
Sandrys Vigulis kruosainais raksturs, dzeivisprīca i naizseikstūšuo energeja naļaun stuovēt iz vītys. Muokslineicys “myužeigais dziniejs” ir rodūšuo dzeive – i rodūt tekstildorbus, i struodojūt bārnu muokslys školā, i īkūpūt sovu duorzu, i īdvasmojūt ar sarunu sovus školānus i cylvākus sūpluok. Rūkdorbi ir muokslineicys atpyuta, meditaceja i jaunu ideju radeišona. Juos dorbi ir daudzveideigi i nav leidzeigi cyts cytam, jo meistare eksperimentej i atkluoj jaunus materialus sovu rūkdorbu veiduošonai, partū dorbi ir myusdīneigi. Sandra Vigule it kai spielejās ar vysaidom tehnikom i kruosom, tok, īpazeistūt materialu, roda izstruoduojumim interesantus rokstu i formu rysynuojumus.
J. Graubiņa Leivuona Muzykys i muokslys školā struodojūt kai školuotuoja, jei 30 dorba godūs ir pīsadalejuse daudzuos izstuodēs Leivuonā i Latgolā. Sandra Vigule voda ari rodūšuos darbneicys, vuica vysaidys tehnikys i īdvasmoj jaunīšus i pīaugušūs pīpiļdeit sovu dzeivi, veidojūt skaistumlītys pošim. Ar sovim rūkdorbim jei jau 20 godu pīsadola lelajā godatiergā Etnografiskajā breivdobys muzejā, popularizejūt Leivuona nūvodu i rūkdorbu daiļamatnīceibu.
Muokslineica soka: “Muni dorbi sylda, prīcynoj munus tyvūs i meilūs Latvejā. Lela prīca, ka cylvākim pateik i jī volkoj munus veikumus – capuris, šaļus, apmetņus voi cymdus.” Godu gaitā naskaitami rūkdorbi ir aizceļuojuši iz Igauneju, Leitovu, Pūleju, Vuoceju, Suomeju, Japanu, Kanadu, Italeju.
Sandra Vigule dzymuse Aulejā, 1992. godā pabeiguse Rēzeknis lītiškuos muokslys vydsškolu, pabeiguse muokslinīka meistara rūkdorbu specialitati. J. Vītuola Latvejis Muzykys akademejā dabuojuse pedagogiskū izgleiteibu. Niu realizejās kai muokslineica i struodoj J. Graubiņa Leivuona Muzykys i muokslys školā par školuotuoju.
