Rokstu sagataveja: portals lakuga.lv

Rēzeknis nūvoda Nagļu tautys nomā 18. februarī 15.00 stuņdēs gaidoms muzykals uzvadums “Es asu, tu esi Plōciņu Mase”. Kai stuosta vīna nu uzvaduma autoru, Nagļu pogosta tautys noma vadeituoja Anna Baleiša, uzvadumā byus dzīsmis, daņči i septeni skeči par Nagļu pogostu i Rēzeknis nūvodu.

Plōciņu Mase ir gondreiž voi legendars tāls, kuru izveiduojuse Rēzeknis piļsātys gazetys “Rēzeknes Vēstis” ilggadeja žurnaliste i Rēzeknis Tautys teatra aktrise Anita Graudiņa. Plōciņu Masis humoristiskuos viestulis jau godim var skaiteit vītejā Rēzeknis gazetā. Da šam Plōciņu Mase ir izdavuse treis gruomotys: “Plōciņu Mase roksta” (1994-2003), “Plōciņu Mase roksta iz Kaliporneju” (2003-2008) i “Plōciņu Mase roksta” (2021), kurā trejūs symtūs puslopu apkūpuotys vysys vaira nikai 25 godu garumā iz Kaliporneju syuteituos viestulis.

Kai stuosta Nagļu pogosta tautys noma vadeituoja Anna Baleiša, itys muzikalais uzvadums ir jaunums, kurā ar lelu entuziasmu pīsadola ari Nagļu pogosta vītejī dzeivuotuoji. Uzvadumā sagataveišonā īsasaisteja ari Plōciņu Masis meita Iveta Graudiņa, kura paleidzēja sagataveit skečus, pa vydu īpynūt pa kaidam anekdotam i papyldynojūt ar dzīsmem. Pasuokuma gūda dalineica byus ari poša Anita Graudiņa.

Ari Anna Baleiša ir uzvaduma tekstu leidzautore, jei stuosta, ka uzvadumā byus septeni skeči par Nagļu pogostu i Rēzeknis nūvodu, dzeivuotuoji raksteis viestuli prezidentam Egilam Levitam ar lyugumu beidzūt nūasfaļtēt ceļu Varakļuoni-Nagli-Īdeņa, byus sovs Mašu proletariats i vysi pasuokuma skateituoji tiks cīneiti ari ar eistim pluocinim. Anna ari dasoka, ka vyss pasuokums byus latgaliski i gostūs teik aicynuoti vysi nūvoda dzeivuotuoji.