Rokstu sagataveja: portals lakuga.lv

Marta suokys daudzim līk dūmuot, ka pavasars jau tiuleņ, tiuleņ byus kluotyn. Tū sovūs ituos nedelis kulturys īsacejumūs akcentej ari Kristiāna Rancāne – mozuo uzjāmuma “SimplyLove” saimineica i kruosojamuos mandalu gruomotys latgaliski “Byut!” autore.

“Sieviete Personība” Peliečūs

Nūteikti pyrmais, kū varātu īsaceit, ir breineigs pasuokums Preiļu nūvoda Pelieču kulturys nomā. Pasuokums nūtiks 10. martā, tam dūts skaneigs nūsaukums “Sieviete Personība”. Ar stuostu par sovim sapynim i tūs realizaceju daleisīs Saeimys deputate Anita Brakovska, dzīdūšuo gide Irēna Kjarkuža, Maizis muzeja eipašneica Vija Kudiņa, školuotuoja i Pelieču pogosta aktiviste Guna Sileniece, lavandu lauka “Lavandrūtas” saimineica Aija Rancāne, kai ari es, Kristiāna Rancāne. Pasuokums paradzāts na tik sīvītem, bet ari kungim. Pīsasaceišona ir leidz 9. martam, partū vēļ var paspēt rezervēt sev vītu i baudeit byušonu sūpluok Peliečūs, kur byus vareiba na viņ klauseitīs īdvasmojūšu sīvīšu stuostūs, tok ari baudeit talanteigu veirīšu muzykalūs prīšknasumus. Sasateikam, kab īsadvasmuotu kūpā!

Pavasara suokys – ar mīru sirdī

Koč i pavasarī gribīs palikt aktivuokam, vysu paspēt i dareit vaira, juoatrūn laiks sev i mīram. Kruosojamuo mandalu gruomota “Byut!” ir na viņ veids, kai nūsamīrēt, tok ari suokt skaiteit latgaliski. Kluotyn vēļ – tei ir ari breineiga duovona sevkuram, kuram nūvielej īsavuiceit byut ite i niu.

Kruosoj mandalys i skaiti latgaliski! Varbyut tys paliks par tovu jaunū hobeju?

Pavodi laiku ar meilajim

Itymā steidzeigajā laikmatā mes bīži aizmierstam par tū, kas ir nu sirds svareigs. Aizmierstam par tū, cik svareigi ir byut sūpluok i byut kūpā. Atsazeišu, ka ari poša ar itū grākoju, tok itamā nedeļā (i na tik) īsoku byut kūpā! Kūpā aizīt iz koncertu voi kinu, izcept blīnus svātdīnis reitā voi koč pusstuņdeiti nu sirds pasarunuot. Izmontuot laiku tam, kas eistyn svareigs.