Rokstu sagataveja: portals lakuga.lv

Ūtardiņ, 30. majā, Latvejis Zynuotņu akademeja (LZA) Aglyunā reikoj paplašynuotu izbraukuma sēdi “Krievijai blakus: vēsturiskais mantojums, šodienas un nākotnes izaicinājumi”. Sēdis tematika i nūtikšonys vīta izvālāta piec LZA gūda lūcekļa Juoņa Streiča īrūsynuojuma, apsazynojūt niulejū geopolitiskū situaceju i pīaugūšūs draudus, kas sasaasynuoja ar 2022. gods 24. februara Krīvejis pylna mārūga ībrukumu Ukrainā. Sēdē ar prīšklasejumim pīsadaleis vodūšī Latvejis viesturnīki i tīseibu zynuotnīki, volūdnīceibys i socialūs zynuotņu specialisti, drūseibys politikys eksperti i sabīdryskī darbinīki, viestej Zynuotņu akademejis publicātuo informaceja.

Izbraukuma sēdis mierkis ir styprynuot Latvejis tautys vīnuoteibu, apzynuot i atguodynuot par Krīvejis i Baļtejis tautu, eipaši latvīšu tautys, attīceibom paguotnē, mozynuot padūmu laikā izveiduotūs mitus, apzynuot viesturiskūs puoridarejumus, taipoš kai godu dasmytim pīkūptuos rusifikacejis sakys, kas eipaši jiutomys Latgolā.

Izbraukuma sēdē teik plānuots ari atguodynuot par pozitivū ītekmi, kaida ir 2021. godā pījimtajam Latvīšu viesturiskūs zemu lykumam regionaluos identitatis kūpšonā.

Pasuokumu atkluos LZA prezidents Ivars Kalviņš, Vaļsts prezidents Egils Levits, arhiveiskups Zbignevs Stankevičs, kinorežisors Juoņs Streičs. Ar prīšklasejumim sēdē pīsadaleis jurists Jānis Pleps, NATO Strategiskuos komunikacejis izcileibys centra direktors Jānis Sārts, viesturnīki Valters Ščerbinskis, Irēna Saleniece, Zigmārs Turčinskis i Vladislavs Malahovskis, ekonomiste Baiba Rivža, sabīdryskais darbinīks Dainis Īvāns, folklorys pietnieca Janīna Kursīte, volūdnīki Anna Stafecka i Alberts Sarkanis, muokslinīks Ontons Rancāns.

Izbraukuma sēdē aicynuoti pīsadaleit školuotuoji, pošvaļdeibu vadeituoji, Latvejis sabīdreiba i sevkurs, kuram ryup Latvejis vīnuoteiba i nu tuos izrītūšuo Latvejis drūseiba.

Sēdis nūtikšonys vīta ir Aglyunys Katuoļu gimnazeja (A. Broka īla 6, Aglyuna, Aglyunys pogosts, Preiļu nūvods). Sēdis programu var apsavērt ITE.