Rokstu sagataveja: portals lakuga.lv

Vīnā nu leluokūs muzykys i muokslys festivalu pasaulī – “Glastonberija” –, kas junī nūteik Lelbritanejā, itūgod vysu muokslinīku vydā byus ari latvīšu etno-pop grupa “Tautumeitas”. Grupa festivalā uzastuos divejis reizis – 21. i 24. junī. Kai portalam lakuga.lv apstyprynuoja grupys menedžmenta puorstuove Guna Zučika – grupys programā festivalā nūteikti izskanēs ari dzīsmis latgaliski.

Itei byus viņ trešuo reize, kod slovonajā festivalā uzastuos kaids nu Latvejis – pyrma desmit godu, 2013. godā, tys beja īsadevs grupai “Prāta Vētra”, bet 2015. godā festivalā uzastuoja grupa “DAGAMBA”. Grupa “Tautumeitas” ituo gods festivalā uzastuos vasalys divejis reizis – festivala atkluošonys pasuokumā 21. junī i iz “Toad Hall” skotivis sastdiņ, 24. junī, tyuleņ piec pušnakts. Leidza ar grupu “Tautumeitas” pyrmū reizi festivalā nu skotivis izskanēs ari latgalīšu volūda.

Aicynuojumu pīsadaleit festivalā “Tautumeitas” sajāmušys piec sekmeiguo starta Eiropys muzykys industrejis konferencē-festivalā “Eurosonic” Nēderlandis piļsātā Groningenā. Bojans Pinters, kurs izalosa grupys festivala zonys “Green Futures” skotivem, kurūs vydā ari “Toad Hall”, i redzēja “Tautumeitu” uzastuošonu “Eurosonic”, stuosta, ka jū savaļdzynuojs grupys spieceigais vizualais skots i prīšknasumā paruodeitais latvīšu paganiskais kulturys montuojums. “Dažu minutu laikā es īgrymu prīšknasuma unikalajā atmosferā, kū radeja “Tautumeitu” muzyka i performance,” soka Bojans.

“Tautumeitu” dalineica Asnate Rancāne atsazeist, ka “Glastonberejis” festivals asūt daudzu muziku sapyns: “Deļtuo asam sajiusmā i jau vairuokus mienešus napacīteigi turim nūslāpumā tū, ka itūgod na viņ uzastuosim tī ar koncertu, bet ari byusim daļa nu grandiozuos festivala atkluošonys ceremonejis taišni vosorys saulgrīžu naktī!”

“Glastonberejis” festivalu kasgods apmeklej aptyvai 200 000 ļaužu i beletus iz festivalu īrosts izgiun mozuok nakai stuņdis laikā. Ituo gods festivala golvonī muokslinīki byus grupys “Arctic Monkeys”, “Guns N’Roses”, muzikis Eltons Džons i daudzi cyti, kas kuops iz vaira nakai 50 festivala skotivu.

Maja golā grupa “Tautumeitas” uzastuoja pasauļa muzykys festivalā “Imaterial” Portugalē, nūslēdze albuma “Skrejceļs” Latvejis koncertturi, bet tyvuokī koncerti vosorā byus 17. junī Kuldeigā, 14. julī Jiurmolā, 15. julī Līgatnē, kai ari grupu varēs redzēt i dzierdēt Igaunejis festivalā “Treskifest” i Vuocejis festivalā “Norden Fest”.

Atguodynuosim, ka par albuma “Skrejceļs” latgaliskajom dzīsmem grupa itūgod sajēme ari Latgalīšu kulturys goda bolvu “Boņuks 2022”.