Rokstu sagataveja: portals lakuga.lv

Rogovkā ir namaineiga tradiceja 29. junī svieteit Pīterdīnu, kod nautrānīši gūdynoj dzejnīku Pīteru Jurceņu i vysus pogosta Pīterus. Kai stuosta Rēzeknis nūvoda Nautrānu apvīneibys kulturys pasuokumu organizatoru vadeituoja Inga Vigule, īprīšk ir bejuši koncerti, vakariešona pi gunkura, pogostu amatermuokslys kolektivu uzastuošona i citys aktivitatis, tok namaineigs ir pīminis breids Desetnīku kopūs, kurs itūgod nūtiks 18.00 stuņdēs.

Itūgod Pīterdīna tikšūt atzeimuota eipaši ļusteigi. 19.00 stuņdēs pi Nautrānu sporta hallis – KN (nalabvieleigu laika apstuokļu gadejumā – īšktelpuos) nūtiks Pīterdīnys koncerts. Tuo laikā byus ari literatu konkursa, kas ir veļteits P. Jurciņa pīmiņai, nūslāgums. Itūgod konkursa moto ir  Pītera Jurciņa vuordi: “Kotrai laimeigai dīnai gon jau ir kaids aizkura dedziejs.” Kotrys nominacejis laureats sajims naudys premeju 100 (vīns symts) EUR apmārā, kai ari byus specbolva nu Latgalīšu volūdys, literaturys i kulturviesturis školuotuoju asociacejis (LVLKŠA) par bārnu prozu latgalīšu volūdā. Konkursa laureatu dorbi tiks publicāti ari portalā lakuga.lv.

Pīterdīnā ar vysaidom peršom gasteis stuostnīki Cybuļu Jurs, Krapacu Ļuce i Krakopu Zintis, kas pastuosteis ari par jūs jaunū gruomotu “Groznuo kuorta”. Sovpus par ļustem kuojom i sirdei pasaryupēs folklorys kūpa “Upīte”, kas i dzīduos, i daņci vess.

Pasuokums nūtiks 29. junī:

18.00 – pīminis breids Desetnīku kopūs

19.00 – “Pīterdīna Rogovkā” – koncerts pi Nautrānu sporta hallis – KN, literatu konkursa nūslāgums i laureatu apbolvuošona, Pīteru gūdynuošona.

Pasuokums nūtiks ar Vaļsts kulturkapitala fonda mierkprogramys “Latvīšu viesturiskūs zemu atteisteibys programa” atbaļsteituos Latgolys kulturys programys finansialu atbolstu.