Rokstu sagataveja: portals lakuga.lv

Itūnedeļ Ludzā nūteik ritma meistarklasis komponistis Vijis Mooris vadeibā, kas ir kai gataveišonuos muzykalajai leidzdaleibys izruodei “85”, ar kurū svātdiņ, 11. junī, pīminēs 85 godus nu Ludzys leluo guņsgrāka, kas nazkod iznycynuoja trešdaļu Ludzys kuormu, ap 2000 cylvāku atstuoja bez sātu i nabadzeiguokuo kvartala dzeivuotuojus, guņs beja nūgrīzuse vysus biegšonys ceļus, īdzyna azarā, informej izruodis veiduotuoji.

Izruode “85” nūtiks Ludzys Leluo azara pludmalē, jo taišni tī pyrma 85 godu rysynuojuos dramatiskuos nūtikšonys: cylvāki stuovēja da placu iudinī, turūt bārnus i svareiguokuos montys iz augšu pacaltuos rūkuos. Tok reizē tys byus laikmeteigs, muzykals stuosts par tū, kas mums kotram šudiņ ir voi varātu byut tik nūzeimeigs, lai mes tū gluobtu.

Izruodis komponiste i muzykys izpiļdeituoja ir dzīduošuo buņdzineica Vija Moore. Scenareja i režejis autore – Marika Čerņavska. Dramaturgs i tekstu leidzautors – Juoņs Golubovs. Grafiskū dizainu taiseja Paula Baranova.

Ar sovim stuostim izruodē daleisīs sakralūs prīškmatu restaurators Aigars Pilenieks, Vaļsts guņsdzieseibys i gluobšonys dīnasta Ludzys dalis prīkšnīks Juoņs Klodāns, školuotuoja Vanda Žulina, ukraiņu biegle Nadiia Kotyshchuk i cyti. Izruodē dorbojās Ludzys dzeivuotuoji – kusteibu teatra grupys audziekni, bīdreibys “Musturprieks” dalineicys i cyti.

Ludzā dzeivojūšuos režisoris, bīdreibys “Teātris azotē” vadeituojis Marikys Čerņavskys veiduotuo izruode “Pa mīlesteibu brīnūt, kuojis nasaļ” ar Ontona Kūkuoja dzeju, kas veļteita dzejnīka 80 godu jubilejam, sajāmuse Latgalīšu kulturys goda bolvu “Boņuks 2020”. Sovā darbeibā jei roda ari kūpīnys teatra nūtikšonys, kas vārstys iz kaidys dzeivuotuoju grupys kaidā konkretā teritorejā atteisteišonu, izzynuošonu i vīnuošonu ar teatra leidzeklim. Izzynojūt kūpīnu i tuos stuostus, caur tū var veicynuot lokalpatriotismu i pīdereibys sajiutu.