Rokstu sagataveja: portals lakuga.lv

Bārnu i saimu grupa “Rupuči” izsludynuojuse sovu pyrmū lelū koncertu “Runoj, dzīd i blieņojās…”. Tys paradzāts svātdiņ, 26. novembrī, Rēzeknē, Latgolys viestnīceibys “Gors” Lelajā zālē, viestej koncerta reikuotuoju publicātuo informaceja.

Bārnu i saimu grupā “Rupuči” apsavīnuojuši Kristaps, Ernests i Terēze Rasimi, kai ari Luocs NuMeža. Itaidā sastuovā sovā saimē jī muzicej i dora vysaidys interesantys lītys jau lobu laiku, tok kai grupa publiski zynomi nu 2021. gods gola, kod izdūts digitals muzykys albums bārnim “Vuškeņa iz pļovys”.

Albumā “Vuškeņa iz pļovys”, atsasaucūt latgalīšu kulturys kusteibys “Volūda” aicynuojumam, dzīšmu formatā puortapuši septeni literatis Ilzis Spergys saraksteiti i muokslineicys Līgys Romančukys ilustrāti bārnu dzejūļu gruomotys “Vuškeņa iz pļovys” dzejūli. Gruomota i dzīšmu albums tyka ari par vīnu nu Latgalīšu kulturys goda bolvys “Boņuks 2021” sajiemieju, kai ari grupa i albums beja vīni nu nominantu muzykys īrokstu goda bolvā “Zelta mikrofons 2023”.

Piec veiksmeiguo publiskuo starta ar “Vuškeņu iz pļovys”, “Rupuči” albuma dzīsmem radeja kotrai jaunu videoklipu, kai ari sataiseja poši sovu video kanalu bārnim i saimem – ar video kanalu var īpasazeit ITE. Niu Rasimu saime sovus mozūs i lelūs draugus gotovi aicynuot iz leluoku sasatikšonu 26. novembrī 15.00 stuņdēs.

Koncerta “Runoj, dzīd i blieņojās” beleti nūpārkami “Biļešu Paradīze” tierdznīceibys vītuos i škārsteiklā, beletu cenys nu 12 da 20 eiro. Koncertu reikoj grupa “Bez PVN”, kurys daleibnīks ir Kristaps Rasims, informativi atbolsta latgalīšu kulturys ziņu portals lakuga.lv i latgalīšu kulturys kusteiba “Volūda”.