Rokstu sagataveja: portals lakuga.lv

Tikū piec dzīšmu i deju svātku, bet jau ar skotu iz prīšku vosorys nūtikšonuos – ar taidu sajiutu šūnedeļ sagataveit sovus īsacejumus aicynuojom Lūznovys muižys puorvaļdneicu, deju kūpys “Dziga” i kadriļu grupys “Lūznovys kadriļs” doncuotuoju Ivetu Balčūni.

Vosorys vyda bauda

Itymā nedeļgolā, 15. julī, Lūznovys muižā byus tradicionalais muokslu i garšu festivals “Muokslys pikniks”. Aicynoju atbraukt gostūs i izbaudeit vosorys vyda atmosferu. Pasuokums ir draudzeigs kai lelim, tai mozim i kotrys varēs atrast koč kū sev pīmāruotu. Asam pasaceņtuši, kab byutu nazkas laikmeteigs, nazkas storptautyskys, ari nazkas aktivs – skanēs grupys “JUUK” muzyka, vokaluo grupa “Putni”, Ernys Daugavietis i Reiņa Jaunuo duets, taipat byus muzykalī gosti nu Italejis i Lelbritanejis. Vēļ par vīnu nu jaunumu ir pasaryupejuši ari myusu sābri – gostu sāta “Svilpaunieki”, kuri taišni sastdiņ atkluos jaunumu muižys parka pīduovuojumā – teiklu parku. Tī tod varēs pīdzeivuot pasakuopšonu tyvuok Lūznovys plykspuornim, pasadzeivuot kūku vydā. Kai kotru godu, ari itūgod aicynoju “Muokslys piknika” komandai pīsavīnuot ari breivpruoteigūs jaunīšus – tei ir vareiba paraudzeit sovus spākus, pīsadolūt pasauokuma reikuošonā i nūdrūsynuošonā, byut leidzdaleigim na viņ kai daleibnīkim, tok ari paleigim. Interesenti drūsai var sasazynuot ar muižu!

Azaru styga i Latgolys doba

Īsoku cytim i ari poša vēļ itamā vosorā meilupruot pīsavīnuotu kaidai grupeņai, kura īt īpazeit Latgolys puorguojīņu turisma maršrutu “Azaru styga”. Maršrutā ir ari organizātī puorguojīnī – taids tyvuokais byus 22. julī Preiļu pusē. Tok ari bez organizātu puorguojīņu var izīt kaidu sev tyvuokū maršruta pūsmu i atkluot sev Latgolys dobys skaistumu vosorys vydā. Prīcojamīs, ka vīns nu “Azaru stygys” maršrutu īt ari gar Lūznovys muižu – varit īīt gostūs!

Šaļteņa terasei

Juņs i juļs dreizim sūlim jau skrīn paceli, bet mums kotram vajag, nu cīši vajag raudzeit atrast tū šaļteņu, kod vīnkuorši atsasēst iz kaidys vosorys terasis i iz breisneiņu atsastuot. Tei var byut kaidys kopejneicys terase, par pīmāru, Aglyunys “Terase Egle”, Rēzeknis “Rancāna pogolms” voi Ludzā “8. rajons”, kotrys pats sev kaidā pļovā koč iz stuņdeiti var sataiseit “terasi”, var nūbraukt gostūs i pasēdēt iz draugu terasis voi pošam sovys, ka taida ir. Pasēdēt vosorys vokorā pi čaja, parunuot vīnam ar ūtru, koč voi puorskaiteit jaunūkū žurnala “A12” numeri – tiuleņ jau jauns byus, bet poša vēļ itū naasu īspiejuse. Juoatrūn tei nūstuošonys šaļts!