Rokstu sagataveja: portals lakuga.lv

Tikū nūsaslēdze latgalīšu volūdys i kulturys vosorys kursi “Vosoruošona 2023”, deļtam itūreiz kulturys īsacejumus nedeļai pīduovoj Māreite Šadurska, kura “Vosoruošonā” pīsadaleja pyrmū reizi, sovpus kasdīnā ir kulturys pasuokumu organizatore Rēzeknis nūvoda Lūznovys pogostā. Doncoj tautu dejis, spielej komandu sporta veidu MAMANET, taipoš Māreitei pateik teatris – kai pošai pīsadaleit, tai i vadeit.

Māreitis atziņa piec “Vosoruošonys” kursu nūslāguma: “Vuiceitīs gramatiku vajag vysu laiku, koč es asu filologs, ir lītys, kas aizamierst, kursūs dabuoju daudz jaunys nūdareigys informacejis, kū, ka byus vareiba, variešu izmontuot, vuicūt školānus.”

Gastej Rēzeknis nūvoda Ūzulainis pogosta svātkūs

Vēļ da 12. augusta Rēzeknis nūvoda Ūzulainis pogostā nūteik aktiva pogosta svātku svietiešona. Izstuode, biljarda, volejbola i makšoruošonys saceņseibys, sporta spēlis saimem, koncerti i rodūšuos darbneicys. Itūnedeļ Ūzulainis pogostā sevkurs atrass, kū lobu padareit!

Suoc reitu ar vyngruošonu

Māreite rauga vyngruot kotru reitu, i tū pošu īsoka ari cytim – vajag izastaipeit, kab uzlobuotu naviņ gorastuovūkli, tok ari formys!

Runoj voi vuicīs runuot latgaliski

Kab volūda byutu dzeiva, tamā ir juorunoj! Tai īsoka ari Māreite – ka tu jau jādzi runuot latgaliski, vuici cytus, ka najādzi – nasabeisti vuiceitīs! Runoj latgaliski ari ar sovim i rodu bārnim, skaiti jim puorsokys latgalīšu volūdā.