Otkon ustobā! Fotoreportaža nu 22. aiļu i dzīšmu festivala “Upītes Uobeļduorzs”
Rokstu sagataveja: portals lakuga.lv
16. septembrī Bolvu nūvoda Škilbānu pogosta namaterialuos kulturys montuojuma centrā “Upīte” jau 22. reizi nūtyka meilys aiļu i dzīšmu festivals “Upītes Uobeļduorzs”. Portals lakuga.lv pīduovoj foto īsavieršonu festivalā.
Jau tradicionali festivalā “Upītes Uobeļduorzs” alinīku uzastuošonys mejās ar muziķu i grupu prīšknasumim. Itūreiz iz skotivis kuope ailinīki Mārīte Slišāne, Arnis Bukšs, Ineta Atpile-Jugane, Annele Slišāne, Ilze Sperga, Līga Slišāne, Gunta Ločmele, Līvija Liepdruviete, Jana Skrivļa-Čevere i Rasma Svikle, bet muziķu vydā beja folklorys kūpa “Upīte”, folklorys kūpa “Ceidari”, projekts “Vuordi”, grupa “Kei-Rei”, dzīduotuoja Santa Savicka-Drozdova, grupa “Unknown Artist”, grupa “Gandreiž 10nīkā”, grupa “Dabasu Durovys”, dzīsminīks Vinsents Kūkojs, grupa “Reibums”, grupa “Fak’n’Turīs” i apvīneiba “Naktenīks i Reiti”, kai ari eipašī gosti “Pienvedēja piedzīvojumi”, kurim iz vīnu dzīsmi – “Pienvedēja piedzīvojumi” latgaliski puorliktū verseju – pīsavīnuoja Arņs Slobožanins. Itūreiz festivala vadeituojs beja Ritvars Carevs.
Atguodynuosim, ka eilys aiļu i dzīšmu festivals “Upītes Uobeļduorzs” nūteik jau vaira nakai 20 godu, i tys ir vacuokais da ituo nūteikūšais latgalīšu festivals pasaulī. Pasuokuma idejis autors ir latgalīšu literats, nūvodpietnīks Ontons Slišāns, kurš sovulaik īsadūmuoja sataiseit sovpateigu Dzejas dīnom veļteitu festivalu, kab popularizātu i saglobuotu latgalīšu volūdu. Itūšaļt festivala organiziešonu turpynoj Ontona dāls Andris Slišāns ar saimi, saglobojūt festivalu kai kasgadeju sasatikšonas reizi, kurā skaņ latgalīšu volūda. Piec vairuoku godu puortraukuma festivals otkon nūtyka ustobā – piec rekonstrukcejis otkon attaiseitajā namaterialuos kulturys montuojuma centrā “Upīte”. Vaira par rekonstrukceju i centra otkon attaiseišonu var puorskaiteit ITE.
Festivala “Upītes Uobeļduorzs” reikuotuojs ir namaterialuos kulturas montuojuma centrs “Upīte”, bet pasuocīņa nūtikšonu atbolsta Bolvu nūvoda pošvaļdeiba i Vaļsts kulturkapitala fonds, informativi atbolsta latgalīšu kulturys ziņu portals lakuga.lv.
Fotogalerejā: reportaža nu festivala “Upītes Uobeļduorzs”, foto Edeite Laime/portals lakuga.lv
