Rokstu sagataveja: portals lakuga.lv

Novembris ir eistais laiks, kab svieteitu breiveibu i Latveju. Tū var dareit kai ar karūdzeņu dalikšonu pi mašynys voi mieteļa, tai ar konservim, kuri taiseiti nu sovā sātā izaudzātuo. Mes zynim, ka leluokuo Latvejis boguoteiba ir cylvāki, tok nadamierssim ari par myusu mozajim draugim – sātys dzeivinīkim. Gaidūt vaļsts svātkus, itunedeļ īsacejumus īsoka Vaļsts rūbežsardzis Ludzys puorvaļdis Zylupis 1. kategorejis dzeļžaceļa rūbežkontrolis punkta vacuokais inspektors leitnants i eistyns latgalīts Andis Misāns.

Dalic karūdzeņu

Vīna nu myusu dīnu vaļsts svātku svieteišonys tradiceju Latvejā ir karūgu braucīns 18. novembrī. Īsoku ari tev tymā pīsadaleit voi vīnkuorši dalikt karūdzeņu pi mašynys. Tys ir lobs veids, kai izjust svātku sajiutu. Asu pīfiksiejs, ka tū jau puora godu dora daudzi cylvāki Latvejā!

Sameiļoj sātys dzeivinīkus

Vīna nu lobuokūs sajiutu ir apziņa, ka tevi kaids gaida sātā. Vīnam tys ir suneits ci kačeits, tok mums īrātajā dzeivūklī Rēzeknē jau vīnu godu tī ir diveji šmuki papagaileiši! Sameiļoj sovus dzeivinīkus sātā!

Sasyldi sevi ar iedīni

Novembris ir eistais laiks, kod viļkt uorā zīmys kruojumus. Vīnam garšoj salati, cytam gaļa, tok es personeigi navaru dzeivuot bez tāva mediejumu i muotis gordumu, eipaši rudiņa soltajā laikā, kod gribīs paēst kū ta cīši garšeigu i sovu.