Rokstu sagataveja: portals lakuga.lv

“Tyvojās svātku laiks, deļtuo es īsoku ceņstīs izbaudeit itū skriejīni, kod teik pierktys i gataveitys duovuonys sovim meilajim,” tai pastreipoj ituos nedelis kulturys īsacejumu autore Līga Springa. Līga ir latgaliskuo plānuotuoja “Giut breidi” idejis autore i pošvaļdeibys agenturys “Rēzeknis Kulturys i turysma centrs” direktoris vītneica.

Svieteit svātkus ar “Giut breidi”

21. decembrī dūditēs iz KUUP kopejneicu, kab sasatyktu ar “Giut breidi” komandu i nasteidzeigai baudeitu svātkus, svietejūt ari golda spēlis “A kas ite?” prezentaceju.

“Giut breidi” komanda ir sataisejuse latgalīšu vuordu kaitu vysim vacumim jautrai i izgleitojūšai laika pavadeišonai saimē, školā ci draugu lūkā. Kaita sastuov nu 100 kartu, kuruos apkūpuoti 600 vysaiduoki vuordi latgalīšu volūdā, tok, lai tys nabīdynoj, vuordi ir paraleli latgalīšu rokstu volūdā i latvīšu literarajā volūdā.

Ka laiks nalutynoj, tod palutynoj sevi pats

Laiks myus itūšaļt nalutynoj, tok jius nabādojit – rodit svātku jutūni poši! Īsoku termosā sataiseit sylta čaja, pagiut leidza piparkūkys voi puors mandarinu i dūtīs pastaigā. Aicynoju īelpuot Rēzekni voi kaidu cytu piļsātu, izstaiguot īlys, kurys kasdīnā tev ir svešys. Pīstuoj kaidā bekerejā i pajem buļceņu, kas īkriss acīs. Izgaršoj tū, nasasteidz i baudi breivdīnys!

Baudi kulturys pīduovuojumu

Breivdīnys sūluos byut puorpiļdeitys ar kulturys pīduovuojumu. Nūteikti īsaver Latgolys viestnīceibys “Gors” pīduovuojumā. Vys jau tī byus kaida nūtikšona, kas uzrunuos ari tevi. Baudi skanis, atmosferu i svātku sajiutu. Vokorā īsoku palikt sātā i sareikuot kinu vokoru. “Vīns pats sātā” byus ideala kina, gaidūt Zīmyssvātku veceiti.

Lai jauki i sirsneigi svātki! Kab syltums i meilesteiba volda jiusu sātā!