Rokstu sagataveja: portals lakuga.lv

Jau ūtrū godu Rēzeknē nūtiks pyrma svātku labdareibys muokslys tiergs aba, kai tū sauc organizatori, bazars “neskarts”, kura mierkis ir atbaļsteit jaunūs muokslys talantus i snēgt Zīmyssvātku īsapierkšonys pīredzi ar pīvīnuotū vierteibu. Kai informej pasuokuma organizatoru puorstuove Evelīna Elksnīte, ari itūgod vēļ komercejis naskorta muoksla īdzeivynuos seņ naskortu vītu – bejušū Rēzeknis guņsdziesieju depo, pasuokumam nūteikūt J. Tiņanova īlā 6, ūtrajā stuovā. Nu 21. da 23. i nu 27. da 30. decembra tī tiks izstuodeiti MIKC Latgolys Muzykys i muokslys vydsškolys (LMMV) i Latvejis Muokslys akademejis Latgolys filialis studentu dorbi, kurūs varēs dabuot apmaiņā pret zīduojumim.

Tī, kas grib pyrmī tikt pi jaunūs muokslinīku dorbu, aicynuoti iz pasuokuma atkluošonu 21. decembrī 19.00 stuņdēs, kod baudeit muokslu varēs eipaša muzykaluo pīdzeivuojuma laikā. Uzastuos muziks HENRII i grupa DISTRICT-9, sovpus LMMV Džeza i Tradicionaluos muzykys nūdaļu puorstuovi vīnuosīs kūpeigā džema sesejā. Juodasoka, ka tim, kas napaspēs iz tierdzeņu tikt pyrmī, nav juopuordzeivoj, jo ekspoziceja pasuokuma gaitā tiks papyldynuota.

Pasuokuma organizatori stuosta, ka tū varēs baudeit ari kai nūlyktovys tipa izstuodi. Skulpturys, gleznys, dizaina prīškmati, keramikys i grafikys dorbi, instalacejis i projekcejis – byušona muokslys kruosom piļdeitajā skuovīnī byuškūt loba pyrma svātku laika kulturys pīredze, kurā veļdzētīs nu egleišu i snīgaveiru puorpiļdeituos kulturtelpys. 29. decembrī 19.00 stuņdēs, tyvojūtīs pasuokuma i goda izskaņai, nūtiks “Bazars par mākslu” diskuseja, aktualizejūt muokslys procesu nūzeimeibu sabīdreibā. Sovpus bazaram nūsaslādzūt, 30. decembrī 16.00 stuņdēs jaunī muokslinīki svineigi dabuos par jūs dorbim sajimtūs zīduojumu urnys, daleisīs pīredzē, īspaidūs i atziņuos.

Cikom kas komercejis, nūsacejumu, ekspektaceju, sabīdreibys izsluoņuojumu naskorta – rodūša, naīrūbežuota i autentiska – taida muoksla sagaida bazara apmaklātuojus, sūlej tuo organizatori. I kotrys zīduotuojs, kurs izalaseis kaidu muokslys dorbu nest iz sātu, jaunūs muokslinīkus īdrūsynuos dzeivuot ar patīsumu pret sevi i sovu muokslu, patīsumu pret sovys muokslys cīneituojim. “neskarts” pasuokumu koncepts radīs, kab izcaltu jaunūs muokslys talantus Rēzeknē i Latgolā, snāgtu jaunajim muokslinīkim publicitatis i naformaluos izgleiteibys platformu, kai ari vareibu sajimt atbolstu talantu izkūpšonai iz prīšku.