Komponists Edgars Mākens izdevs albumu ar latgalīšu tautysdzīšmu apdarem
Rokstu sagataveja: portals lakuga.lv
Komponists Edgars Mākens klauseituojim pīduovoj minialbumu “Treis putneņi”, kurū veidoj ostonis latgalīšu tautysdzīšmu apdaris, informej komponista puorstuove Aiga Leitholde. Vokala parteju albumā izpylda Liene Skrebinska, jū pavoda deveņu muziku ansamblis.
Cyklā “Treis putneņi” ītylpst dzīsmis i instrumentali skaņdorbi, kurūs vīnoj dzīduošonys tema, skaistys i eipašys melodejis. “Vokala parteju izpylda Liene Skrebinska ar cīši spieceigu, tok tymā pošā laikā cīši jiuteigu i gūdeigu bolsu. Cytaiž muzykā kūpumā dominej pyušamūs instrumentu kolorits – taids kai nalels lauku pyutieju orkestris,“ īpazeistynoj Edgars Mākens.
Albuma īroksta pīsadalejuši: Aleksandrs Maslovs (klarnete i ansambļa vadeiba), Rūdolfs Pēteris Rubenis (baritonsaksofons), Gatis Gorkuša (trompete), Māris Evelons (mežrogs), Artūrs Bērziņš (trombons), Laura Muceniece (trombons), Gaitis Pujāts (tuba), Aldis Kise (akordeons), Raitis Viļumovs (sytamī instrumenti) i Liene Skrebinska (bolss).
“Treis putneņi” īsuokumā radeiti par gūdu Latgolys viestnīceibys “Gors” desmitgadis koncertam ar Vaļsts kulturkapitala fonda atbolstu i piečuok ari īraksteits Latvejis Radejis 1. studejā skaņu operatora Gustava Ērenpreisa vadeibā. Albumu masterēja Krišjānis Geidāns.
Niu albumu var nūsaklauseit vītnē Bandcamp, tok piec mieneša tys byušūt daīmams ari popularuokajuos škārsteikla muzykys straumiešonys vītnēs.
