Rokstu sagataveja: portals lakuga.lv

Nu 8. da 22. marta Rotko muzejā jau divpadsmytū reizi nūtiks Latgolys grafikys simpozejs, kurā pīsadaleis grafiki nu Pūlejis, Fraņcejis, Horvatejis, Itālejis, Igaunejis, Latvejis i Taivānys, informej tuo organizatori.

Muokslys rezideņču formatā realizātais i grafikys medejam veļteitais Latgolys grafikys simpozejs ir unikals projekts Latvejis kulturtelpā ar geografisku i idejisku dasaisti regionam i plašu storptautysku tvārumu. Simpozeja ideja i koncepcija pīdar bīdreibai “SIVIA”, kas Rotko muzeja rezideņču programā tū organizej jau nu 2013. goda.

Simpozejs ir storptautyskai atzeitu grafiku sasatikšonys i teikluošonuos platforma, kas sekmej ideju apmaiņu i veicynoj muokslinīcyskū jaunradi. Itūgod tys nūtiks jau divpadsmytū reizi, turpynojūt puļcēt vys jaunus medejā struodojūšus muokslinīkus. Aizvadeitūs godu laikā simpozejā pīsadalejuši jau vysmoz symts grafiku nu vaira nakai četrdesmit vaļstu.

2024. gods simpozejam žureja izvierzeja deveņus muokslinīkus. Tī ir Magda Šplita (Magda Szplit, Pūleja), Henriks Krolikovskis (Henryk Krolikowski, Pūleja), Peili Huana (Peili Huang, Taivāna), Vitālija Samuilova (Vitalia Samuilova, Fraņceja), Lorenco Natāli (Lorenzo Natali, Itāleja), Edvins Dragičevičs (Edvin Dragičević, Horvateja), Kadri Tomma (Kadri Tomm, Igauneja), Paskāls Piņons Žafs (Pascal Pignon Jaf, Fraņceja), Anna Klosa (Anna Kłos, Pūleja) i Oksana Vronska (Latveja).

Īsadvasmojūt Daugovpiļs piļsātvidē, muokslinīki radeis unikalys laikmeteiguos grafikys kompozicejis par temu “Laiks”, kas itūgod nūsaceita par simpozeja vodmotivu.

Simpozeja programā plānuotys muokslinīku prezentacejis, darbneicys, meistarklasis i ekskursejis. Simpozejs nūsaslēgs ar daleibnīku sumynuošonu i izstuodis atkluošonu Rotko muzejā 22. martā 16.00 stuņdēs. Īīšona iz publiskajom prezentacejom i izstuodis atkluošonu byus bez moksys.