Rokstu sagataveja: portals lakuga.lv

25. majā Rēzeknis nūvoda Dubuļūs nūtiks stygu skriejīņu seriala “Styrnu buks” 2024. gods sezonys 3. pūsmys “Dubuļu Styrnu buks”, informej pasuokuma organizatori. Tys ir pyrmais pūsmys Latgolā piec ostoņu godu puortraukuma, vysi distaņču nūsaukumi ir latgaliski, bet pasuokuma nūslāgumā Lūznovys muižā gaidoma Leluo Latgolys zaļumballe, iz kurū teik gaideiti kai “Styrnu buka” daleibnīki, tai sevkurs interesents.

“Dubuļu Styrnu buks” eipašs ari ar tū, ka tuo laikā nūtiks Latvejis 2024. gods čempionats ultragarajā stygu skrīšonys disciplinā, kas byus aptyvai 76 km distaņce “GARMIN FĒNIX Vylks”. Tai starts tiks dūts pi Lūznovys muižys, bet finišs byus augstuokajā Latvejis cīmā – Dubuļūs, Kaunatys pogostā, kur skriejīņus aizvadeis ari puorejūs distaņču daleibnīki.

“Cīši prīcojamēs, ka vīns nu “Styrnu buka” seriala pūsmim beidzūt nūtiks pi myusu – Latvejis Zylūs azaru i Zaļūs pakolnu zemē. Cīši simboliski, ka skriejīņa epicentrs byus Dubuļu cīma apleicīnē, kurs atsarūn vysaugstuok nu vysu cīmu Latvejā. Turu lelu nūceju, ka itys skriejīņs byus jauns atspierīņa punkts i popularizēs stygu skriejīņa serialu Rēzeknis nūvoda školu jaunuotnis i dzeivuotuoju vydā,” soka Rēzeknis nūvoda sporta školys direktors Aldis Cyukmacis.

“Dubuļu Styrnu buka” stygu skriejiejim byus vareiba dūtīs ari īrostajuos distaņcēs – “KARTE VESELĪBA Začs” 14,5 kilometru skriejīnī, “VENDEN Styrnu buks” 24 kilometru puorbaudejumā, “Vuovere” 6 kilometru izaicynuojumā, kai ari tikpat garajā LVM školānu čempionata skriejīnī, i, prūtams, kilometru garajā mozūs “GARDU MUTI Susurs” trasē. “ENEFIT puorguojīņs” cīneituojim itūreiz tiks pīduovuotys 14,5 i 24 kilometru distaņcis.

Piec apbolvuošonys ceremonejis vysi teik aicynuoti iz Lelū Latgolys zaļumballi Lūznovys muižā nu 19.00 stuņžu. Zaļumballi īskandynuos grupa “TRIO Rāzna +”, bet vokora ūtrajā daļā apmaklātuojus energiski i skaneigai izklaidēs grupa “Stradivari”. Īīšonys moksa ballē – 4 eiro.

Pasuokuma organizatori pastreipoj, ka itei ir eipaši aizsorguojama dobys teritoreja i atsarast Rāznys nacionalajā parkā jau ir eipaša privilegeja. Jī aicynoj pamest aiz seve teiru vidi, skriejīnī jimt leidza sovus iudiņa traukus, kai ari nanūsavierzeit nu īzeimātuos stygys, cīneit vītu i tamā voldūšūs nūsacejumus, kas paleidz saglobuot apleik asūšū skaistumu.

Stygu skriejīņu serials “Styrnu buks” ir leluokais tautys sporta serials Latvejā. Kotrā pūsmā skriejiejim i nūjuotuojim, kai ari puorguojīņu distaņcis daleibnīkim bez laika kontrolis ir vareiba īpazeit skaistuokuos i ainovyskuokuos Latvejis vītys i mežus. “Styrnu buka” sezona suocās martā i nūsaslādz oktobrī, sezonys laikā pīduovojūt septeņus dažaidus pūsmus dažaiduos ainovyskuos vītuos. Distaņcis pīmāruotys kai mozim, tai lelim “bukim”, kuri ar fiziskom aktivitatem nūsadorboj jau seņ, kai ari tim, kas sovus spākus suokuši atteisteit viņ naseņ. Īprīškejū i vīneigū reizi Latgolā “Styrnu buka” pūsmys nūtyka 2016. godā Rēzeknis nūvoda Muokūņkolnā.