Rokstu sagataveja: portals lakuga.lv

Bīdreiba “Danču krātuve”, kas taisa i iztur portalu dancukratuve.lv, sasadorbojūt ar folklorys kūpu nu Rēzeknis “Vīteri” publiciejuse catūrtū daņču gruomotu i albumu, kas veļteits bārnu daņču muzykai, viestej izdevieju sagataveituo informaceja.

Gruomota “Bērnu danči un ne tikai” i muzykys albums “Ak tī, jandālī” veļteiti bārnu dančim, kas ir vysu meiluokī i bīžuok doncuotī folklorys daugu kūpys “Vīteri” bārnu sastuova dalinīku vydā. “Vīteru” īdzīduotajā i īspālātajā albumā ir īraksteita 21 melodeja, kurūs vydā taidi labi zynomi daņči kai “Pankūkas”, “Krakovjaks”, “Kur tu teci”, “Cūkas driķos” i cyti, vairuoki ari vēļ na cik pazeistami i cytur tautā doncuoti. Vysu danču vydā seši ir taidi, kuri pīraksteiti Latgolā: “Krakovjaks”, “Lipa kust”, “Atašīnis suseklis”, “Zīlānu dancis”, “Sieņu polka” i “Zvierbuļs (ceiruļs) olu dora”. Dorbs pi jaunuo albuma bejs treis godu garumā, izalosūt i doncojūt daņčus, gatavejūt aranžejis i īrokstus studejā pi skaņu režisora Eināra Lipska.

“Vīteru” vadeituoja Sandra Stare stuosta, ka daņču repertuars asūt taids, kaidu īmeiļuojuši “Vīteru” bārni i kotrys varūt doncuot leidza. “Dzīsmis tyka īraksteitys pandemejis laikā, kas ļuove folklorys kūpai turpynuot jāga pylnu dorbu, struodojūt studejā. Juopīzeist, ka laiks vys guojs iz prīšku, tuo laika bārni jau pasaauguši, niu palykuši pusaudži i vītā guojuse jauna bārnu paaudze. Turu nūceju, ka itys izdavums byus paleigs vysim muzykys školuotuojim i folklorys kūpu, kuru sastuovā ir mozi bārni, vadeituojim. Prīcynoj viests, ka itūs īrokstus sovom deju interpretacejom jau izmontoj tūpūši horeografi,” soka S. Stare.

Vysys danču melodejis izdavumā papyldynuotys ar daņču horeografejis aprokstim, tehniskajim i daņčus skaidrojūšajim zeimiejumim, kai ari notu materialu. Bīdreibys “Danču krātuve” vadeituojs Sandis Zučiks stuosta, ka Juoņa dīnys laiks ir svareiga nūtikšona latvīšu dzeivē, deļtuo jaunuo albuma izdūšona labi papyldynuos svātku svieteišonu. “Juoņa dīnys svieteišonys laikā saimis voi plotuokā lūkā bīži sova vīta ir ari tradicejom, par pīmāru, doncuošonai, deļtuo turu nūceju, ka “Vīteru” albums byus breineigs paleigs vysys saimis sasadoncuošonai svātkūs, eipaši prīcynuos mozuokūs doncuotuojus, kuri varēs lēkt leidza dančim i dzīduot ar “Vīteru” bārnim,” soka Sandis Zučiks.

Folklorys kūpai “Vīteri” itys ir jau pīktais muzykys albums, bet “Danču krātuvei” catūrtais itaida veida izdavums, turpynojūt aizsuoktū daņču populariziešonys izdavumu kolekceju. 2021. godā publicāts izdavums “Vidzemes danči un ne tikai” ar albumu “Lieli danči, mazi danči”, kū īspēlējuse kapela “Karikste”, 2022. godā latgalīšu rokstu i latvīšu literarajā volūdā publicāts izdavums “Latgales danči un ne tikai” ar albumu “Ekur, šekur”, kū īspēlējuse folklorys kūpa “Svātra”, bet 2024. godā izdūti ari “Cittautu danči un ne tikai” ar albumu “Šai svešā pusītē”, kurū īspēlējuse tradicionaluos muzykys grupa “Banga”.

Jaunais izdavums gruomotys i CD formatā daīmams “Jānis Roze” i “Globuss” gruomatneicuos, bet albuma digitaluo īroksta verseju var nūsaklauseit i zamynīluodēt dancukratuve.lv sadaļā “Mūzika”, pi izpiļdeituoju izalosūt “Vīterus”.