Rokstu sagataveja: portals lakuga.lv

Grupa “Staiguļi” ituo gods suokumā publiceja sovu ūtrū singlu “Santimu sentiments”, tok niu sovim klauseituojim pīduovoj trešū singlu “Ej šī”. Dzīsmis videoklips izveiduots ar muoksleiguo intelekta paleidzeibu.

Kai stuosta grupys puorstuovi: “Adventa gaisūtne pīšķir singlam īpašu nūzeimi, deļtam ka, taipat kai Zīmyssvātku gaideišonys laika, ari dzīsmis pamatjāga ir bezgaleiga mīlesteiba i pīdūšona. Dzīsmis viestejumu papyldynoj vizualais video stuosts, kas radeits, izmontojūt muoksleigū intelektu (MI). Tys nūzeimej, ka vysi personaži i skoti ir izdūmuoti, dzeivē taidus nasastapt.”

Muzykys i dzīsmis idejis autors – Arņs Slobožanins, teksta autori – Emileja Kalvāne i Ontons Slišāns. Īroksts radeits sadarbeibā ar Māri Keišu “Bigmaar’s Records” īrokstu studejā.

Grupys “Staiguļi” sastuovs īt nu Ludzys nūvoda Saļnovys pogosta pusis. Grupys sastuovā niu dorbojās: Einārs Čoičs (bungys), Mareks Punans (basgitara), Mārtiņš Laganovskis-Vesers (akustiskuo gitara), Edgars Potašs (sologitara), Jurs Vuorkaļs (akordeons, bolss), Arita Rancāne (bolss). Grupa sovu debejis singlu “Imūns” publiceja 2023. godā.