Rokstu sagataveja: portals lakuga.lv

Latgolys regionaluo televizeja (LRT) suoc raidejumu cykla “Skolām (ne)būt!” puorraidi. Televizejis ekranūs pyrmū raidejumu par naseņ slāgtū Prīžmolys pamatškolu Kruoslovys nūvodā kanalā TV24 i ReTV kanala vierszemis apraidē varēs redzēt jau 1. i 3. februarī.

Raidejumu cykla “Skolām (ne)būt!” pyrmajā raidejumā varēs gasteit Prīžmolys pamatškolā, kas sovā symtajā pastuoviešonys godadīnā puoruok moza školānu skaita deļ teik slāgta. Raidejums īsavērsīs pādejuo školys vuiceibu goda dīnys pasuokumūs, īsaklauseis audziekņu, školys darbinīku i vītejūs dzeivuotuoju redzīņūs, kai ari vosorys gaitā sekuos leidza reorganizacejis procesam i atmiņu saglobuošonai. Sirdssyltuos emocejuos par školys viesturi i nūzeimeigumu lauku vidē daleisīs školys direktore Sandra Rakova, bet attuolynuotai rakstisku atbiļdi snēgs Kruoslovys nūvoda Izgleiteibys puorvaļdis vadeituoja Lidija Miglāne.

Projekts “Skolām (ne)būt!” viesteis par septeņom dažaidom izgleiteibys īstuodem Latgolā i tūs liktini kai laukūs i piļsātvidē, tai Latgolys regiona vidīnē i pīrūbeža teritorejuos. Raidejuma veiduotuoji brauks iz školom, kas ir jau slāgtys īprīšk i niu tūs telpys ir tukšys voi ari turpynoj darbeibu cytā veidūlā, kai ari apmeklēs tuos vuiceibu īstuodis, kam optimizacejis planu deļ itūšaļt draud sliegšona voi izgleiteibys pakuopis samazynuošona. Piļsātu školuos raidejums analizēs tūs gataveibu uzjimt vēļ leluoku školānu skaitu klasēs, īsavērs, kai atsateista puorīšona iz vuiceibom latvīšu volūdā vītuos, kur da šam beja ari krīvvolūdeigūs plyusma.

Raidejumu cykla “Skolām (ne)būt!” vysi septeni raidejumi, suocūt ar 1. februari, da 15. marta tiks puorraideiti kotru sastdīni 16.00 stuņdēs kanalā TV24 i pyrmūdīnēs 17.30 stuņdēs kanala Re:TV vierszemis apraidē Latgolys regionalajā televizejā. Taipat kotram raidejumam sekuos atkuortuojumi kanalā TV24 svātdīnēs 14.30 stuņdēs i ūtardīnēs kanala Re:TV vierszemis apraidē Latgolys regionalajā televizejā 7.00 stuņdēs.

Piec kotra raidejuma puorraidis televizejā tūs varēs atrast LRT sātyslopā lrtv.lv, kai ari vītnēs Facebook, YouTube i platformā xtv.lv.

Raidejuma veiduotuoji gaideis ari jiusu atsauksmis i īsacejumus viestulēs pa postu, adrese: Rēzekne, Atbreivuošonys aleja 98, LV-4601 ar nūruodi Latgolys regionalajai televizejai voi LRT socialūs medeju lopuos, kai ari e-postā lrt.zinas@inbox.lv voi zvonūt/rokstūt iz tel. nr. 26339536.

Projektu finansej Medeju atbolsta fonds nu Latvejis vaļsts budžeta leidzekļu. Par raidejumu cykla “Skolām (ne)būt!” saturu atbiļd SIA “Latgales reģionālā televīzija”. #SIF_MAF2024

Fotogalerejā biļdis nu Latgolys regionaluos televizejis gasteišonys Prīžmolys pamatškolā. Foto: Ausma Sprukte-Kozule/Latgolys regionaluo televizeja

Publikaceju apmoksoj Latgolys regionaluo televizeja