Rokstu sagataveja: portals lakuga.lv

Jau viestejom, ka Latgolys regionaluo televizeja (LRT) aizsuokuse jaunu raidejumu cyklu “Skolām (ne)būt!”. Ūtrū tuo raidejumu par Rudzātu vydsškolu Leivuona nūvodā televizejis ekranūs kanalā TV24 i Re:TV vierszemis apraidē varēs redzēt jau 8. i 10. februarī.

Raidejumu cykla “Skolām (ne)būt!” ūtrajā raidejumā LRT gasteis Rudzātu vydsškolā, kur taišni vydsškolys vuiceibu pūsma klasēs itūšaļt vuicuos 27 školāni. Itaids školānu skaits naatbylst Izgleiteibys i zynuotnis ministrejis nūsaceitajom praseibom školu teiklu optimizacejis planā, partū školai draud izgleiteibys pakuopis samazynuošona, nasaverūt iz tuo, ka Rudzātu vydsškolys školāni teik pi gūdolguotu vītu olimpiadēs i eksamenu rezultati ir augstuoki par videjū ruodeituoju vaļstī. Raidejums īsavērs pyrmuo vuiceibu semestra nūslāguma pasuokumā, kod pyrma zīmys breivlaika školānim pasnāgtys līceibys i atzineibys par lobom sekmem i sasnāgumim vuiceibuos. Tiks īsaklauseits audziekņu, dzymdynuotuoju i školys darbinīku redzīnī par vydsškolys pūsma napīcīšameibu, īpasazeits ar Izgleiteibys i zynuotnis ministrejis datim par školu reorganizaceju, taipat ar redzīni pasadaleis Leivuona nūvoda pošvaļdeibys Izgleiteibys puorvaļdis vadeituoja Ilze Vanaga i Leivuona nūvoda dūmis prīšksādātuojs Andris Vaivods.

Projekts “Skolām (ne)būt!” viesteis par septeņom dažaidom izgleiteibys īstuodem Latgolā i tūs liktini kai laukūs i piļsātvidē, tai Latgolys regiona vidīnē i pīrūbeža teritorejuos. Raidejuma veiduotuoji brauks iz školom, kas ir jau slāgtys īprīšk i niu tūs telpys ir tukšys voi ari turpynoj darbeibu cytā veidūlā, kai ari apmeklēs tuos vuiceibu īstuodis, kam optimizacejis planu deļ itūšaļt draud sliegšona voi izgleiteibys pakuopis samazynuošona. Piļsātu školuos raidejums analizēs tūs gataveibu uzjimt vēļ leluoku školānu skaitu klasēs, īsavērs, kai atsateista puorīšona iz vuiceibom latvīšu volūdā vītuos, kur da šam beja ari krīvvolūdeigūs plyusma.

Raidejumu cykla “Skolām (ne)būt!” vysi septeni raidejumi, suocūt ar 1. februari, da 15. marta tiks puorraideiti kotru sastdīni 16.00 stuņdēs kanalā TV24 i pyrmūdīnēs 17.30 stuņdēs kanala Re:TV vierszemis apraidē Latgolys regionalajā televizejā. Taipat kotram raidejumam sekuos atkuortuojumi kanalā TV24 svātdīnēs 14.30 stuņdēs i ūtardīnēs kanala Re:TV vierszemis apraidē Latgolys regionalajā televizejā 7.00 stuņdēs.

Piec kotra raidejuma puorraidis televizejā tūs varēs atrast LRT sātyslopā lrtv.lv, kai ari vītnēs Facebook, YouTube i platformā xtv.lv.

Raidejuma veiduotuoji gaideis ari jiusu atsauksmis i īsacejumus viestulēs pa postu, adrese: Rēzekne, Atbreivuošonys aleja 98, LV-4601 ar nūruodi Latgolys regionalajai televizejai voi LRT socialūs medeju lopuos, kai ari e-postā lrt.zinas@inbox.lv voi zvonūt/rokstūt iz tel. nr. 26339536.

Projektu finansej Medeju atbolsta fonds nu Latvejis vaļsts budžeta leidzekļu. Par raidejumu cykla “Skolām (ne)būt!” saturu atbiļd SIA “Latgales reģionālā televīzija”. #SIF_MAF2024

Fotogalerejā biļdis nu Latgolys regionaluos televizejis gasteišonys Rudzātu vydsškolā. Foto: Latgolys regionaluo televizeja

Publikaceju apmoksoj Latgolys regionaluo televizeja