Rokstu sagataveja: portals lakuga.lv

Kulturys īsacejumus itai nedeļai sagatavejuse Zigrīda Gorsvāne – jei nu ituo gods pavasara ir Rēzeknis Centraluos bibliotekys direktore. Zigrīda īsoka pagasteit Duorza svātkūs Rogovkā, nūbraukt iz Čertoku i Rāznys azaru, kai ari apsavērt izstuodi Latgolys Kulturviesturis muzejā.

Pionejis Rogovkā

Kai pioneju meiļuotuoja nu sirds īsoku dūtīs iz Dainys Duorznīku školu Rogovkā! Tī, puordūmuotai veiduotā kolekceju duorzā, volda eista harmoneja – skaistums, zynuošonys i sirds syltums. 14. junī 11.00 stuņdēs tī nūtiks eipašs pasuokums “Duorza svātki”, kurā varēsit baudeit kopeju, gordu iedīni, laistīs Dainys Zvejsalniecis vadeitā ekskursejā pa juos 35 godus kūptū duorzu, īsaguoduot stuodus i vītejūs muokslineicu dorbus. Īdvasmojūša pīredze vysom maņom! Vaira par pasuokumu var izzynuot ITE.

Valna azars aba Čertoks – skaidruma i klusuma ūsta

Ka gribi nūstuot, īsaklauseit i byut vīnatnē ar dobu, dūdīs iz Valna azaru. Itys nūslāpumainais azars, saukts ari par Čertoku voi Valna azaru, atsarūn Kruoslovys nūvoda Škeļtovys pogostā. Tuo iudiņa caurradzameiba ir leidz pat ostoņu metru, i tam nav ītaku voi iztaku – azars pats sev pīteikams. Klusa, gondreiž mistiska vīta, kur smeļtīs spāku, mīru i īdviesmi. Ideala vīta dobys i iudiņa cīneituojim. Nūbrauc i sajiuti pats!

Rāznys krosti i Muokūņkolns – vīta, kur klusums runoj latgaliski

Rāznys azars, Latgolys jiura, ir daudz vaira nakai tik atpyutys vīta. Itei vīta maņ simbolizej breiveibu, dobys spāku i Latgolys naskortū skaistumu. Tei ir telpa goreigai sakuortuoteibai, puordūmom i dziļai īelpai.

Kuopūt Muokūņkolnā, sajiuti dobys vareigumu i Latgolys viesturis spāku. Ite klusums eistyn runoj latgaliski – ar mīru, dziļumu i saknem. Ideala vīta, kur byut paceli nu steigys i tyvuok sev pošam.

Sajiutu duorzs gleznuos

Da 15. juņa Latgolys Kulturviesturis muzejā apsaverama Inesis Elizabetis Brimerbergys izstuode “Sajūtu dārzs”. Muokslineica gleznuos īlīk pavasara vīglumu, smuordus, skanis – eista sajiutu terapeja. Eipaši sirsneigai, ka dorbūs daudzi rūžu, gūdynojūt Rēzeknis 740. jubileju i legendu par Rūzi. Īsoku īsagrīzt i iz šaļti nūstuot itymā zīdu pasaulī! Vaira par izstuodi var izzynuot ITE.