Rokstu sagataveja: portals lakuga.lv

Itūnedeļ vysā Latvejā volda eipašs nūskaņuojums – Reigā skaņ XIII Latvejis Školu jaunuotnis dzīšmu i deju svātki. Tyukstūšom bārnu i jaunīšu saīt kūpā, kab dzīduotu, doncuotu i gūduotu myusu tautys tradicejis. Ka i palīc sātā, tev ir vareiba sajust itū svātku goru – ar dzīsmi, stuostu, garšom i saimis syltumu. Īsacejumus itai nedeļai pīduovoj Preiļu Golvonuos bibliotekys vadeituojis vītneica Sigita Trūpa.

Izstuode bārnim “Vai grāmatai ir knābis?”

Preiļu Golvonajā bibliotekā da 31. juļa apsaverama izgleitojūša i aizraunūša izstuode pyrmaškolys vacuma bārnim i jūs saimem “Vai grāmatai ir knābis?”, kurū organizej Latvejis Nacionaluos bibliotekys Atbolsta bīdreiba. Izstuode vadynoj bārnus skaiteit, atkluot bibliotekys, īpazeistynoj ar gruomotom i skaiteitprīcu. Tamā mozī pietnīki izsekoj gruomotys ceļam nu rakstnīka radeituo stuosta da gruomotu plaukta. Bārni, poši dorbojūtīs, varēs nūskaidruot, kur rūnās gruomotys, kai īīt gruomotā, īsavuiceit sacerēt stuostus, īsajust muokslinīka lūmā, īpazeit burtus i redzēt, kai tī sasateik vuordūs. Bārnim i pīaugušajim byus vareiba pasmaideit, tapt puorsteigtim i atrast jaunu īdviesmi vosorys skaiteišonai.

Pagatavej sātā latgalisku pīna iedīni i izstuosti sovu stuostu latgaliski

Breivdīnys byus eistais laiks, kab kūpā ar bārnim, mozbārnim i draugim pagatavet kū vīnkuoršu i gordu nu tradicionalūs Latgolys produktu. Par pīmāru, bīzuo pīna bumbenis ar madu voi ūgom, sātys svīstu nu lauku kriejuma, pīna kļocku zupu. Vaira īdviesmis receptem vari vaicuot ITE.

Kūpeiga ēst gataveišona vīnoj saimi. Cikom iedīņs tūp, pastuostit cyts cytam kaidu sirdei meiļu stuostu latgaliski. Par sovu bierneibu, vacvacuoku omotim, lauku dorbim, senejom svātku tradicejom voi pyrmū daņci zaļumballē. Mozī klauseisīs ar interesi, cikom lelajim tei byus vareiba iz šaļti nūstuot i atguoduot. Itai na tik saglobuosim volūdu, tok ari radeisim sirsneigu kūpā byušonys sajiutu.

Muzyka i gruomotys mīrpylnom šaļtim

Itūnedeļ laikapstuokli dīvamžāļ sūluos byut maineigi i lītaini – eistais laiks mīreigai skaiteišonai sātā voi verandā ar čaja krušku. Īsoku izavielēt kaida sirsneigu dorbu, kas sasylda sirdi i ļaun īsavērt Latgolys cylvāku dzeivis rytumā i dvēselis pasaulī. Īrūsmei: Annelis Slišānis “Tuoraga stuosti”, Inetys Atpilis-Juganis dzeja “Spuornu golu šolks”, Valentina Lukaševiča esejis “Casnāgu maizeitis”, Annys Rancānis dzeja “Svētdiena”, bet bārnim – Ilzis Spergys dzejūļu kruojums “Vuškeņa iz pļovys”. Ideja – puorskaiti kaidu nu gruomotu, izavielej sev teikamu citatu voi atziņu i nūsyuti tū tyvam cylvākam voi sagloboj sovuos pīzeimēs.

Pasaklausi Džeinys Gavaris dzīsmis

Svātku nedeļu vari papyldynuot ar sirsneigom melodejom. Deļtam aicynoju pasaklauseit Džeinys Gavaris dzīsmis. Juos bolss i dzīšmu teksti atguodynoj par sātu, Latgolys ainovom i ļaudim, kuri vysod dzeivoj sirdī.

Vieleju vysim skaistu nedeļu – dzīšmu i deju svātku nūskaņuos, saimis syltumā, seņču tradiceju spākā i Latgolys mīlesteibā!