Dzejūļu autore: Rasma Svikle

Pīteram Jurciņam veļteitajā literatu konkursā autori itūgod tyka aicynuoti īsnēgt dorbus humoreskys, dzejis i bārnu literaturys žanrūs. Par lobuokuos dzejis autori žureja pīzyna Rasmu Svikli, juos dzejūļus pīduovojam puorskaiteit ari portalā lakuga.lv. Rasma roksta jau nu 2006. gods, ir pīsadalejuse trejūs dzejis slamūs “Rogovkys dzejis voga” dzejis slamūs. 2019. godā izguoja juos dzejūļu kruojums “Pārtapšana”.

Bārns

div godi
nabeja rauduots
septembris
suocēs vātra
i osorys spruka
nu dabasim
kūkim lopom
nu zuolis
nu bikšu kabatom
i nu saujis

tik acs
palyka tukšys
sausys
kai muols
kolna golā
pazuda saule
pretim īt nakts
muns nikod
nadzymušais bārns

***

Bierneiba

treis dīnys
jei rauduoja skali
catūrtajā
sagaideja pavasari

izskrēja ar
gūvim gonūs
spriņguoja
pa pļovu

meitine
nu bierneibys
pazuda
pīniņu pļovā

par madu
palyka
muola bļūdā
iz golda

***

Par daudz

vosora
dīnys garys
kai makaroni
stīpās
da papīžim
godi

laika par daudz
par daudz laika

sabārts kabatuos
īstuodeits
pi ustobys pučem
sasvīsts iz divana
pi televizora

čarpāgā
iz plitys
i gunī
dag reizē
ar pagalem
klīdzīņs

laika par daudz
par daudz laika

atbraucit
pi manis
koč iz vīnu
stuņdi

***

Slapnuo vosora

sīns
stogūs sapyva
voguos
stuov iudiņs

kur lyki
vacuos gazetys?
vajag savuokt
iudini

iz čardaka
stuov vasala čupa
mož burti
pagluobs nu leita

***

Kritīņs

kreit
iz apaklis
vuordi

kreit
kai akmini
krusys gryudi

kreit
ceļūs
pošapzina

kreit
pi bazneicys
aiz žūga

kai zeilis
nu ūzula
dzeiveiba kreit

kai rudzu
vuorpa

zuole nu
izkapts pļauta
kreit tik
suopeigi bārns

nu smogys
rūkys
kai pagale
škalta

kod pīsaceļs
mīlesteiba?

trešajā dīnā
augšonceļsīs
nu myrušajim

i sēdēs
pi cylvāka sirds

---

Publikaceja sagataveita ar Vaļsts kulturkapitala fonda atbolstu.