Rokstu sagataveja: Amanda Anusāne, portals lakuga.lv

Ūtardiņ, 29. julī, kopejneicys “Osteria” duorzā, Rēzeknē, nūtyka etnodžeza ansambļa “Bruoli i Muosys” debejis albuma “Na pādejais” attaiseišonys svātki. Ansamblis sataiseits 2023. godā, tymā ir apsavīnuojuši ostoni muziki nu Latgolys Muzykys i muokslys vydsškolys.

Etnodžeza ansamblis “Bruoli i Muosys” tyka izveiduots 2023. gods beiguos Latgolys Muzykys i muokslys vydsškolā, gatavejūtīs 2. storptautyskajam etnodžeza konkursam “Guoyu pa JAZZ” – lūzejūt komandys, nu džeza i tradicionaluos muzykys nūdaļu audziekņu tyka sataiseitys divejis komandys. Tai grupys dalinīki najauši atroda cyts cytu. Piec tam, 2024. gods 8. februarī, sekuoja veiksmeiga daleiba itymā konkursā – dabuota 2. vīta i vareiba uzastuot prestižajā džeza festivalā “Saulkrasti Jazz 2024”. Ansamblī muzicej Jadviga Mežniece (kūkle, vokals), Eduards Geikins-Tolstovs (tausteņinstrumenti), Ieva Sutina (vokals), Ērika Ruhmane (vejūle, vokals), Madara Arbidāne (vokals), Daira Ikstena (vokals), Kristaps Višs (basgitara), Damians Pavlovičs (bungys, perkusejis).

“Ceļš da albuma aizasuoce 2024. godā, kod mes gatavejom programu “Saulkrasti Jazz” festivalam. Vysys dzīsmis, kas izskanēja šudiņ, topa tymā vokorā. Nu tuos reizis mes sajutom, cik breineigi ir kūpā uzastuot, ka cylvākim pateik, jī klausuos myusu muzyku. Suocem izmontuot kotru vareibu koncertēt, bet ceļš da albuma tūreiz vēļ ruodejuos cīši tuols. Itymā vosorā ar cīši intensivu dorbu asam apkūpuojuši ituos dzīsmis, kurys spielejam jau godu. Albums ir daīmams tik digitali, bet ceram, ka kaidu reizi tys byus ari taustomā formatā,” tai par albumu stuosta ansambļa dalineica Jadviga Mežniece.

Taišni albuma attaiseišonys koncertā nūtyka ari Jadvigys Mežnieces kompozicejis “Sauleite sol” etnodžeza ansambļa “Bruoli i Muosys” aranžejā klipa prezentaceja, kura idejis autore i videografe ir Evika Muizniece.

“Kristaps Višs kai muns lobs draugs atguoja pi mane i stuosteja, ka jim ir jaunīšu projekts i vajag tārpus. Tai mes jūs nu munys pyrmuos apgierbu kolekcejis veiksmeigi apmaucem, i jis maņ īslēdze pasaklauseit puora dzīsmis. Suokumā beja dūma sataiseit tik klipu, tok mes padūmuojom i saprotom, ka juoroksta albums i juolaiž tautuos. Lai ari jaunīši vēļ ir svaigi, jī taisa cīši kvalitativu muzyku. Nūsaukumu albumam izdūmuoja Kristaps ar Damianu. Tuo vuoks ir muna skice, i tys apzeimoj vasalu cyklu – nu pavasara da zīmys, nu pīdzimšonys da nūmieršonys. Principā itī jaunīši taidi ari ir – dažaidi sovuos izpausmēs. Niu leluokais puorbaudejums jim byus turpynuot muzicēt, kam leluokuo daļa dalinīku brauc vuiceitīs iz uorzemem, bet, cerams, ka jī turpynuos i mes vēļ par jim dzierdēsim,” tai projekta vadeituoja i multimuokslineica Evika Muizniece.

“Albuma attaiseišonys svātkus taiseit kopejneicā “Osteria” izdūmuoja Kristaps Višs. Jam ruodejuos, ka vosorā Rēzeknē tei ir vysulobuokuo vīta. Mes par reizi pīkrytom, kam jim nav konkurencis itymā žanrā i maņ ari pateik jūs muzyka. Šudiņ ari cīši nūsaveice ar laiku. Mums jau ruodejuos, ka ūtardīnē varātu nabyut cylvāku, bet jūs ir cīši daudz – prīca i jim, i mums,” stuosta vītys puorstuovs Kārlis Taranda.

Itūvosor prezentacejis svātki beja pādejuo reize, kod ansambli varēja dzierdēt koncertejūt, kam niu muziki īt atvalinuojumā. Tok, kab izzynuotu ansambļa planus iz prīšku, muzikim var sekot leidza jūs socialūs medeju kontūs Facebook i Instagram.

Projekts “Ansambļa “Bruoli i Muosys” albuma “Na pādejais” īroksts i muzykys klipa izveide” teik eistynuots ar Vaļsts kulturkapitala fonda miekprogramys “Latvīšu viesturyskūs zemu atteisteibys programa” finansialu atbolstu.

Fotogalerejā biļdis nu albuma prezentacejis svātku. Foto: Amanda Anusāne/portals lakuga.lv