Rokstu sagataveja: portals lakuga.lv

Augusta suokuos izdūta školuotuojam, muokslinīkam, sabīdryskajam darbinīkam i dzymtuos vītys patriotam Modestam Līpenīšam (1934–2008) veļteita gruomota “Modests Līpenīts. Biogrāfisks albums”. Gruomotys autore ir muokslinīka mozmeita Gita Līpenīte, kurys magistra dorbs par vactāva dailradi niu puorvārsts gruomotā. 

Gruomotā “Modests Līpenīts. Biogrāfisks albums” autore, dizainere un Modesta mozmeita Gita Līpenīte apkūpuojuse M. Līpenīša dailradis spūdruokūs pīmārus gleznīceibā, grafikā i fotografejā, kai ari laikabīdru – školys bīdru, dorba kolegu, audziekņu i saimis lūcekļu – atmiņu stuostūs izstuosteitus dzeivis pīturu punktus, vierteibys i pamastū montuojumu. Izdavuma īvodā juo školys bīdris režisors Juoņs Streičs pasadola ar atmiņom par kaidu gasteišonys reizi: “Mani īprīcynuoja aizviņ nūtureiguo juo interešu vyspuseiba i aizkustynuoja uzticeiba Drycānim. [..] Jis ir eists gora gaismys uzturātuojs kai školā, tai apleicīnē.” Drycānu, Taunagys i Jaunstrūžānu školu audzieknim vairuokuos paaudzēs Modests Līpenīts beja kimejis, biologejis i vizualuos muokslys školuotuojs – zynūša, ar stuostnīka talantu apveļteita, praseiga i disciplinu prosūša personeiba. Jis bejs na viņ aizrauteigs dorbā ar školānim, tok ari režisors, akters i scenografs vītejā amaterteatrī. 

Modesta mozdāls Aivars Līpenīts par vactāvu soka tai: “Myusu vactāvs Modests Līpenīts beja na tik guodeigs, rodūšs i jautrys saimis cylvāks, bet ari gleznuotuojs, fotografs, školuotuojs i apleicīnē cīneits pasuokumu runu snīdziejs, lugu īstudātuojs (kūpā ar sovu dzeivis leidzgaitneicu i myusu vacmamu Margaritu), eisumā – sabīdreibys cylvāks. Reizem ari naārts i kaidam gryušuok panasams. Kai jau tys goduos.” 

Sovpus Modesta Līpenīša dailradē vysuvaira puorstuovāta gleznīceiba – akvareļu, ellis, pasteļkreiteņu, guaša i temperys tehnikā. Eipaši meila jam bejuse taišni ainovu gleznīceiba – dzymtūs Drycānu attāluojums. Juo dorbūs radzams senejais pogosta centrys, ākys, apleicīnis dobys skoti, Kruoceitis upe i cyti objekti. Muokslinīka īmeiļuotajā akvareļu tehnikā radeiti ari portreti i pošportreti, klusuos dobys i zīdu kompozicejis.

2022. godā Drycānu draudzis sātā nūtyka izstuode “Modests Līpenīts – Dricānu romantiķis”, kuru organizēja bīdreiba “Maziča”. Bīdreibys projektu vadeituoja Diāna Saksone stuosta: “Drycānūs beja izstuode ar Modesta gleznom. Beja lela apmaklātuoju atsauceiba. Audzieknim beja sentimentalys atminis par sovu školuotuoju. Tai dzyma ideja i pamudynuojums Gitai par gruomotu, kas byutu kai katalogs, kurā var apsavērt vysu juo dailradi vīnuvīt. Eipaši vierteigi, ka Modesta dorbūs radzami Drycānu skoti. Modesta Līpenīša natikšona Muokslys akademejā ir kai taida laime nalaimē. Mums tei ir laime i veiksme, ka taida personeiba vystik palyka ite, Drycānūs, – jis ir īlics zynuošonu pamatus symtim školānu.”

Gruomotys autore Gita Līpenīte pasadola sovuos sajiutuos par dorba procesu: “Ceļš iz gruomotu beja cīši personiskys, na vysod gluds, šaļtim emoceju i puordzeivuojumu pylns, tok interesants i skaists kai doba vactāva gleznuos. Tys beja ceļuojums atpakaļ bierneibā i pat vēļ seņuok, kod sovu vactāvu nimoz vēļ napazynu. Skaitūt sajimtūs atmiņu stuostus, atkluoju sev daudzi jauna par Modestu Līpenīti jauneibā. Laseju, smaideju, īsasmieju, nūbyrdynuoju prīcys i puorsteiguma osorys i izjutu lelu pateiceibu par vuordim, kū atmiņu stuostu autori jam veļtejuši. Tuos beja skaistuokuos šaļts gruomotys radeišonā, kas deve spāku i ticeibu turpynuot breižūs, kod gribieju vysam atmest ar rūku.” Gita pasasoka vysim, kas īsasaisteja, atbaļsteja i snēdze padūmus – rokstūt, zvonūt, uzjamūt gostūs i vysaiži cytaiži paleidzūt, lai gruomota par Modestu Līpenīti tyktu pi skaiteituoju. “Niu nasakautreju saceit, ka asmu lapna par sovu vactāvu, i itys ceļš ir boguotynuojs kai munu personeibu, tai Līpenīšu dzymtu kūpumā. Lai muoksla īdvasmoj i lai tūp – lobais, skaistais, gaišais!”

Gruomotu 100 eksemplarūs izdavuse Modesta Līpenīša saime. Izdavumu varēs nūpierkt Lūznovys muižā i cytuos tierdznīceibys vītuos Latgolā, bet jau tagad gruomotu var īsaguoduot sātyslopā lasuklausos.lv.