Roksta autore: Maruta Latkovska

Šudiņ, 10. augustā, skaistu dzeivis pīturys punktu svietej Līveja Līpdruvīte. Kaidam jei ir školuotuoja, kaidam dzejneica nu Rykovys, cytam loba siebrineica. Tok vīna nu dzeivis vierteibu ir byut breineigam draugam i ka tev ir draugi. Portals sovu sveicīni Līvejai dzimšonys dīnā nūdūd i pīsavīnoj lobajim vuordim caur Marutys Latkovskys viestuli draudzinei.

Vasala, Līveja! 

Tys laiks eistyns skrīn vieja spuornim… 
Jis nu sova pat mudruma drupeit pīkuss i deļtuo itymā breineigajā vosorys mienesī augustā pīstuojs ari pi Tovys sātys durovu Tovā opolūs godu jubilejā, lykdams atsavērt iz īveiktuo i izdareituo.  
Izaudzynuotys treis breineigys meitys, sagaideiti ari unuceni. Eipaši daudz sova laika esi veļtejuse unukam Aleksandram, gon kūpā vāluos rudiņa mauduošonuos pasuocīņus reikojūt, gon paleidzūt gatavuotīs vuiceibu eksamenim. 
Garus godus Rykovys školā esi struoduojuse par latvīšu volūdys i literaturys školuotuoju i klasis audzynuotuoju, ar školānim dolūt jūs prīkus i bādys, dūdūtīs ar jim kūpā puorguojīņūs, kurūs nav tryucs azarta i izdūmys. I jī tuo nav aizmiersuši ari piec garuoka laika, jo meilai  aicynoj Tevi salidojumu reizēs. 
Sovūs teirumūs esi reikuojuse vysaidu labeibu tolkys, lai na viņ poša kū vaira īsavuiceitu nu senioru paaudzis, bet ari jaunajim atkluotu seņču dorba gudreibu atslāgus. Esi jāmuse daleibu pļaušonys saceņseibuos, muokūt rūkuos drūsai jimt izkapti, kas niu vysai rata paruodeiba ir pat myusu stypruo dzymuma aprynduos. 
Tu esi  Rykovys folklorys ansambļa ceņteiga daleibneica, tī esi īdrūsynuojuse i īsaistejuse ari cytys sovys draudzinis. Šūgod sovu komandu kai lobs kapteiņs esi izvadejuse caur latgalīšu olimpiadis viļnim Ūzulmuižā, esi bejuse aktiva školuotuoju kursu “Vosoruošona” dalineica i tekstus cantusēs īrūšt ari pošys raksteituos aiļu rynduos. 
Tai varātu skaiteit vēļ i vēļ, jo Tovys dzeivis ceļā volda dūmuošona i saprasšona, ka zam gulūša akmiņa iudiņs natak.  
Nu sirds asu Tev pateiceiga par Tovu atsauceibu i izdareibu ari  sadzeiviskuos lītuos i tū myužeigū optimismu, kas Tevi pavoda vysuos dzeivis dīnuos. Lai Tev ari iz prīšku daudz gaišuma sirdī i skaidreibys pruotā. 
Zīdim, Līveja, cik viņ varim zīdim!!! 
A vysys pučis šudiņ eistyn Tovys! 
Esi i palic vasala!!! 

 Ar cīnu i pateiceibu: Maruta L.