Rokstu sagataveja: portals lakuga.lv

Īsacejumus itai augusta nedeļai sagatavejuse Lāsma Kursīte-Kozule, jaunuotnis darbineica, bīdreibys “Cita Daugavpils” aktiviste i projektu eistynuotuoja, kura tūs dasoka tai: “Kod vosora tyvojās nūslāgumam, pādejuos nedelis mums duovoj eipašu sajiutu – vēļ gribīs paspēt nūgiut saulis spaitus, izamauduot upēs, azarūs voi jiurā, satikt seņ nasatyktūs cylvākus, bet pa vydu uzpasēt ari duorzu i pīpiļdeit pogrobus ar zīmys kruojumim. Tok es itamā nedeļā vysus aicynoju braukt iz Latgolu, kab kūpā baudeitu muzyku, kulturu i ari pabyutu storp jaunīšim, kurūs energeja i idejis itam godalaikam dadūs eipašu cereibys sajiutu!”

Cytaižuoks retrits

22. augustā nu 13.00 da 16.00 stuņdem MIKC DDMV Saulis školys īškpogolmā nūtiks jaunīšu drūsumspiejis retrits “neRīga, bet cerīga”, kur vīnuvīt puļcēsīs vysaidi eksperti i jaunuotnis jūmys puorstuovi, kab runuotu par tū, kai dzeivi Latvejis austrumu pīrūbežā padareit drūsuoku, lobuoku i pīviļceiguoku jaunīšim. Byus kai jaunīšu pīredzis stuosti, tai paneļdiskusejis, i, prūtams, vysaidys aktivitatis, kurys byus sagatavejuse bīdreiba “Cita Daugavpils”. Dasasaceišona pasuokumam ite: ej.uz/neRigaBetCeriga

Koncerts piec pasuokuma

Piec pasuokuma aicynoju īplānuot braucīni iz Leivuonu – tī 22. augustā nu 18.00 stuņdem nūtiks vēļ diveji muzykali pasuokumi. Leivuona nūvoda jaunīšu centra “Kvartāls” skeitparkā nūtiks diveju jaunīšu – Ievys Birzākys i Viktorijis Naglis – koncerts “Tas ir tikai sākums”. Itys byus jūs pyrmais solo koncerts, partū nūsaukums nav najaušs. Tys ir starts kam leluokam! I kotrys interesents ir aicynuots byut daļai nu ituos šaļts. Pasuokumā skanēs Ievys i Viktorijis meiluokūs dzīšmu “cover” versejis. I zynit, kas ir breineigi? Īīšona ir piļneigi bez moksys!

Koncerts piec koncerta

Taipat Leivuonā, vīnreizeigai magiskā vītā, “Handmade Latgola” duorzā 20.00 stuņdēs uzastuos saksofonu duets “Marta&Neftali”. Itys byus jūs vīneigais 2025. gods vosorys koncerts Latgolā. Īsarūnūt sovlaiceigai (nu 19.00 stuņdem), byus vareiba nūpierkt i baudeit vokora čaju, kopeju voi kaidu cytu dzierīni. Tū varēs izdareit ari storpšaļtī i ari piec koncerta, ka gribiesi uzakavēt drupeit ilguok. Vaira informacejis par koncertu i beleti ite: fienta.com/lv/saksofoni-handmade-latgola