Rokstu sagataveja: portals lakuga.lv

Kulturys īsacejumus itai nedeļai sagatavejuse Gunta Gulbe-Kalvāne, kura ir vīna nu tradicionalūs velosporta svātku “Ar veliku pa Aglyunu” organizatoru. Gunta īsoka baudeit aktivū atpyutu Aglyunā – kai pīsadaleit velosvātkūs, tai pavadeit laiku pi Ciriša azara –, kai ari napalaist garum Varakļuonu jauktuo vokaluo ansambļa “NONA” koncertu Krustpilī.

“Ar veliku pa Aglyunu”

Velosporta svātki “Ar veliku pa Aglyunu” jau 17. gadu Aglyunā puļcej i sportistus, i saimis, i aktivuos atpyutys cīneituojus. Pasuokums teik reikuots ar vītejūs entuziastu i breivpruoteigūs paleidzeibu. Daleiba ir bez moksys, partū sevkurs var pīsavīnuot, naatkareigai nu vacuma voi sagatavuoteibys. Velosvātki pīduovoj vysaidys distaņcis – bārnu škieršļu jūslu, tautys klasi – 15 km distaņci, meistarklasi – 32 km, spāka izaicynuojumu “Tārauda cylvāks”.

Itys ir breineigs veids, kai apvīnuot sportu ar saimis byušonu kūpā i draudzeigu saceņseibu goru. Tradicionalai vysi dalinīki sajam pīminis duovonys i teik apbolvuoti eipašuos nominacejuos, pīmāram, “Kupluokuo saime” voi “Kūšuokais brauciejs”. 2025. godā jaunums byus laika kontrolis sistema, kas padareis saceņseibys vēļ precizuokys i aizraunūšuokys.

Pasuokums tradicionali nūteik augusta pādejā sastdīnē, itūgod – 30. augustā – Aglyunā.

Aktivuo atpyuta Aglyunā

Ka itūnedeļ laiks byus labvieleigs, breineiga ideja ir apmeklēt Aglyunys aktivuos atpyutys vītu pi Ciriša azara. Tī sevkurs var bez moksys paraudzeit SUP dieļus i katamaranus, kai ari nūmuot laivys. Eipaši skaists maršruts ir apbraukt apleik Uperu solai, baudūt mīreigū azaru, putynu bolsus i Latgolys ainovu. Nu iudiņa pasaver breineigs skots iz Aglyunys baziliku – vīnu nu īvārojamuokūs svātvītu Latvejā. Tei ir vareiba apvīnuot aktivu atpyutu ar dobys skaistuma i kulturys montuojuma baudeišonu.

Mīreigs i muzykals vokors

Ka vēļ pyrma jaunuo vuiceibu goda suoku gribīs izbaudeit mīru i skaistu muzykalu vokoru, īsoku dūtīs iz Varakļuonu jauktuo vokaluo ansambļa “Nona” koncertu “Nebeidzama mīlestība” 30. augustā 19.00 stuņdēs Krustpiļs Vyssvātuos Treisvīneibys Romys katuoļu bazneicā.

Tys byus sirsneigs i emocionals koncerts, kurā caur dzīsmem varēs sajust tū, kas vysod ir svareigi – mīlesteibu. Kai īmeiļuotys melodejis, tai jaunys kompozicejis radeis eipašu nūskaņu, kas ļaus nūstuot, sakuortuot dūmys i vīnkuorši pabyut muzykā. Es saceitu – breineigs veids, kai ar syltom sajiutom nūslēgt vosoru i sasagataveit jaunajam ritmam.