Roksta autore: Amanda Anusāne/portals lakuga.lv

Latvejis Televizeja (LTV) atkluojuse 72. sezonu, kurā gaidomys jaunys pymizruodis, kai ari īmeiļuotu raidejumu atsagrīzšona eterā. Nu 11. septembra skateituoji varēs īpazeit ari raidejumu “Neatklātā Latgale”, kas sešys nedelis piec kuortys sešuos serejuos vess ceļuojumā pa zylūs azaru i Muorys zemi, viesteits LTV publicātajā informacejā.

Vīna nu raidejuma “Neatklātā Latgale” vadeituoju byus aktrise Inga Misāne-Grasberga. Jei kūpā ar žurnalisti Keitu Ruožāni (Rožāni) Latgolu atkluos caur latgalīšu volūdys spāku, ļaužu seikstumu i tradiceju montuojumu, kas globojās dzīsmēs, dejuos, keramikā i kasdīnys ritmā. Par sovu pīredzi raidejuma vadeišonā i Latgolys atkluošonā Inga soka: “Mes raudzejom apgiut vysu Latgolu. Sandijs (Semjonovs – raidejuma producents – A.A.) meklēja informaceju caur paziņom, ari es īsaceju vysaidus cylvākus. Tok poša daudzi kū nazynuoju i atkluoju. Palyka loba piecgarša, jo Latgola dzeivoj i dzeivuos. Es ceru, ka ari vītejī atkluos nazkū naatkluotu. Muns nūvāruojums ir taids, ka Latgolā vysi cyts cytu pazeist kai raibu suni. Tei varātu byut tei Latgolys atškireiba nu cytu nūvodu. Vuords “sovs/sovejais” raidejumā cīši bīži izskanēs. Tok nu vītejūs stuostnīku, ar kurim sasatykom, guoja taids atkluojums ci vieliejums – lai vysa Latveja justu tū kūpeibu, ka mes kotrys nūvods asam atškireigi, bet vīnuoti, i vysi latvīši. Ka cytim Latvejis latvīšim vaira juoapsazynoj, ka Latgola nav nazkas atseviškys, ka tei ir naatjamama Latvejis sastuovdaļa. Vēļ vīns muns nūvāruojums – stuosti bīži viņ puorguoja nu latgalīšu iz latvīšu literarū volūdu, jo ūtra raidejuma vadeituoja latgaliski narunoj. Taipat cylvāki vaira dūmuoja par tū, lai skateituojs piec tam vaira saprostu. Tok, kod es ar stuostnīkim runuoju latgaliski, jutu, ka cylvāki beja atvārtuoki nakai tod, kod runuoja latvyski.”

Ingai itei beja pyrmuo raidejuma vadeišonys pīredze: “Es dareju i vuicejūs reizē. Fiļmiešonu laika ziņā vyspuor navar prognozēt. Kotrys latgalīts piec fiļmiešonys vēļ pacīnoj. Mož raidejumā tys tai naatspīgeļuosīs, bet aizkadrā tys beja izteikti. I tod tik suocēs eistuo stuostu stuosteišona, kod kamerys jau beja izslāgtys.”

2020. godā itys projekts īsasuoce ar stuostim par Sieleju, piečuok tyka sagataveiti raidejumi ari par Kūrzemi, Vydzemi i Zemgali, tok niu daguojs laiks atkluot Latgolu. Raidejuma producents i režisors ir Sandijs Semjonovs, kurs par Latgolu i raidejumu soka tai: “Latgolu pametem soldonajam iedīņam, kam maņ personeigi itys nūvods sirdī aizjam cīši lelu daļu. Vīns nu munys mamys vacuoku īt nu Latgolys, ūtrys – nu Sielejis. Latgolā maņ vys vēļ dzeivoj daudzi rodu i draugu. Raugom kotru vosoru iz nedeļu tī nūbraukt. Tei ir loba vīta, kur restartētīs i sasmeļt dobys spāku, kai ari satikt breineigus cylvākus, kurūs Latgolā ir cīši daudz. Koč i raidejums saucās “Neatklātā Latgale”, daudzi kas jau ir zynoms. Pamata vītys, stuosti byus zynomi, tok daudzus godus jau naradzāti voi nadzierdāti. Par pīmāru, kūklātuoja Liene Skrebinska, kinys “Cylvāka bārns” golvonais akters Andrejs Rudzinskis, “Latgalīšu Reps” i cyti. Bejom gostūs i nūbaudejom Latgolys iedīni pi sātys restorana “Dzīles” saimineicys Ainys Barsukovys. Īguojom ari kuorteigā latgalīšu piertī. Taipat runuojom par taidu Latgolys vierteibu kai katuoļticeibu, par patriotismu, kas niu cīši aktuals Ukrainys kontekstā – bejom gostūs pi “Kroma kolna bruolistis”. Kūpumā līkam uzsvoru iz taidim cylvākstuostim, kam taišni cylvāki veidoj tū vidi.”

Vaicojūt par stereotipiskuos Latgolys atainuošonu itaidūs raidejumūs, režisors atbiļd tai: “Vīns nu seneju stereotipu ir par Latgolys kuozom, ka ite dzer šmakovku i beiguos vysi sasakaun. Nazynu, nu kura laika itys stereotips ir, bet tys seņ vaira naeksistej. Tū mes ari paruodeisim. Ite kuozys ir taidys pat, kai cytur Latvejā – ar dzīduošonu, doncuošonu. Varbyut pat vēļ sirsneiguokys. Mes raudzejom naīt taidu tradicionalū i stereotipiskū ceļu. Nabraucem iz šmakovkys muzejim. Suokumā vēremēs turysma ceļvežus i vaicuojom Latgolys Plānuošonys regionam i Latgolys Turysma asociacejai, kur mums nūbraukt, tok nu tuo turysma vystik raudzejom paīt molā, kam saprotom, ka Valnazaru voi Neicgaļa akmini cylvāki poši var nūbraukt apsavērt i atrast. Vaira raudzejom atkluot cylvākus. Ir svareigi, ka jī dorbojās iz vītys, rauga sovus biznesus atteisteit. Lai stuosti byutu ari personeiguoki, bejom pi Ingys mamys, “Saulis školā” (tī Inga vuicejusēs – A.A.), draudzinis Kristīnis [Veinšteinys], kas Daugovpiļs teatrī vys ir vīna nu vodūšūs aktrišu. Daugovpilī aizguojom pasavērt ari nakts dzeivi. Piļsātā, prūtams, ir krīvvolūdeiga vide, tys myus napuorsteidze, tok taipat tī ir vīta ari latgaliskajam i Latgolys vierteibom. Cīši labi, ka mes par vadeituoju izaraudzejom taišni Ingu Misāni-Grasbergu – ar eistynu latgalītis sirdi i dvēseli. Suokumā mums beja ari cyti varianti, tok saprotom, ka tī cylvāki jau ir par daudzi pasaruodejuši publiskajā telpā.”

Raidejumu nu 11. septembra sešys nedelis piec kuortys 19.30 stuņdēs varēs redzēt kanalā LTV1. Nuokušuo sezona raidejumam nav paradzāta i veiduotuoji niu generej cytys idejis. Tok komanda vysod asūt prīceigi veiduot stuostus i atsagrīzt Latgolā. Pyrma ituo raidejuma taiseiti ari cyti projekti ap Latgolu – “Latgale. Trīs stāsti”, “Ar Latgali sirdī”. “Ik pa laikam mes pi Latgolys atsagrīžam, bez jums nikai navar iztikt,” soka Sandijs Semjonovs.

Galerejā raidejuma “Neatklātā Latgale” komandys gasteišona Latgolā. Foto nu Sandija Semjonova personeiguo arhiva