Rokstu sagataveja: portals lakuga.lv

Kai sevkuru godu, tai ari itūgod Latgalīšu kulturys bīdreiba sadarbeibā ar Latgolys Etnografiskū viestnīceibu i Latvejis Izgleiteibys i zynuotnis darbinīku orūdbīdreibu organizej Nikodema Rancāna konkursu izcyluokajiem Latgolys pedagogim, viestej tuo organizatoru puorstuove Ilga Šuplinska. Pīsacejumi teik gaideiti da 15. septembra (īskaitūt). Nūslāguma pasuokums nūtiks 21. septembrī 14 stuņdēs Maltys vydsškolā.

Nikodema Rancāna bolvys mierkis ir styprynuot pedagoga profesejis prestižu i atpazeistameibu sabīdreibā, gūdynojūt izcylu veikumu pedagogiskajā darbeibā i veicynojūt latgaliskuos kulturys tradiceju īaudzynuošonu jaunajā paaudzē. Bolva teik padūta reizi godā pyrmsškolys audzynuotuojim, vyspuorejuos i pamatizgleiteibys īstuožu školuotuojim, kai ari augstuokuos i videjuos profesionaluos izgleiteibys vuiceibu vītu pedagogim. Bolvys svareiguokais aspekts ir školuotuoju īguļdejums vuiceibu dorbā, latgaliskuos kulturys i tradiceju kūpšona.

Pīmiņūt monsinjora N. Rancāna daudzveideigū pedagogiskū i sabīdryskū darbeibu, konkursa laureatim bolvu daškir itaiduos nominacejuos:

• par latgaliskuos vidis radeišonu i latgaliskūs vierteibu saglobuošonu i styprynuošonu pyrmsškolys izgleiteibys īstuodēs;
• par īguļdejumu i sasnāgumim latgalīšu volūdys, kulturviesturis i nūvoda vuiceibys īvīsšonā i īdzeivynuošonā školys vuiceibu vidē;
• par sasnāgumim latgalīšu volūdys, literaturys i kulturviesturis īdzeivynuošonā augstuokuos izgleiteibys īstuodis studeju vidē;
• par rodūšu i psihologiski atbolstūšu pīeju vuiceibu procesa organiziešonā (aicynoj pīsaceit izgleiteibys īstuožu vadeituojus).

Pretendenti vysuos nominacejuos aicynuoti paruodeit modernūs tehnologeju pīlītuojumu vuiceibu dorbā. Apsveicama jaunu metožu i pīeju, strategeju, metodiskūs dorbu izstruode, publikacejis, pīredzis populariziešona, dorbs ar vacuokim i c. Vysuos nominacejuos pretendentim tiks pīškierti papyldu punkti pi izviertiešonys, ka vuiceibu process teik organizāts ari latgalīšu volūdā.

Konkursa žurejis sastuovā ir Latgalīšu kulturys bīdreibys vaļde, Latgolys Etnografiskuo viestnīceiba, Latgolys Plānuošonys regiona pošvaļdeibu puorstuovi.

Konkursa nūlykums i pīsacejuma anketa ir daīmama ITE.