Rokstu sagataveja: portals lakuga.lv

Nikodema Rancāna konkursam ir dasaceiti 17 pretendenti nu Rēzeknis piļsātys i nūvoda, Kruoslovys, Preiļu i Leivuona nūvoda. Nūslāguma pasuokums nūtiks 21. septembrī 14 stuņdēs Maltys vydsškolā, informej Latgalīšu kulturys bīdreibys vadeituoja Ilga Šuplinska.

Nikodema Rancāna bolvai ir dasaceiti 17 pretendenti nu pīcu Latgolys pošvaļdeibu, pyrmū reizi ari nu Leivuona nūvoda. Pretendenti, leidzeigai kai īprīškejā godā puorstuov divejis pamata nominacejis: par īguļdejumu i sasnāgumim latgalīšu volūdys, kulturviesturis un nūvoda vuiceibys īvīsšonā i īdzeivynuošonā školā i par rodūšu i psihologiski atbolstūšu pīeju vuiceibu ci studeju vidē. Itūgod spylgtai var izceļt divejis tendencis: školuotuoji, kas aplīcynuojuši sovu variešonu dzīšmu svātkūs, i školuotuoji ar lelu dorba stažu, var saceit “multimuokslinīki”, partū ka vysim ir kaida aizaraušona, vairuoki dorba i vuiceibu vierzīni.

Konkursa leluo bolva ir sudobra pokovsakta, kurys autors ir rūtkaļs Rihards Ciblis. Tai kai pasuokums nūtiks Maltā, tod byus vareiba satikt pošu bolvys autoru, dazynuot par rūtkaļšonu Maltā. Sovys bolvys padūs ari Latgolys Etnografiskuo viestnīceiba (vadeituoja Iveta Seimanova) i Latvejis Izgleiteibys i zynuotnis darbinīku orūdbīdreiba (vadeituoja Inga Vanaga).

Nūslāguma pasuokums nūtiks 21. septembrī 14 stuņdēs Maltys vydsškolā. Iz pasuokumu gaideiti kai pretendentu izvierzietuoji, tai jūs atbaļsteituoji, poši konkursa daleibnīki, kai ari īprīškejūs godu nominanti i sadarbeibys partneri. Byus muzykalais puorsteigums nu Rēzeknis nūvoda vokaluos studējis “Skonai” (vadeituoja Guntra Kuzmina-Jukna). Naizpaliks ari sirsneigys sarunys i otkon redziešonuos prīca pi čaja.

Konkursu organizej Latgalīšu kulturys bīdreiba sadarbeibā ar Rēzeknis nūvoda pošvaļdeibu. Konkurss ļaun izceļt i gūdynuot lobuokūs nūzaris pedagogus, ceļūt školuotuoja profesejis prestižu sabīdreibā i atguodynojūt, cik svareiga lūma puormaiņu procesā ir izgleiteibai.